इन्जिनियरिङ अध्ययन संस्थानको स्नातक तह प्रवेश परीक्षाको आवेदन असार ३ गतेदेखि खुल्ने

काठमाडौं । इन्जिनियरिङ अध्ययन संस्थान (IOE) ले शैक्षिक सत्र २०८३/८४ का लागि स्नातक तह (BE/B.Arch) को प्रवेश परीक्षा सम्बन्धी सूचना सार्वजनिक गरेको छ। संस्थानअन्तर्गतका आंगिक क्याम्पस तथा सम्बन्धन प्राप्त कलेजहरूमा विद्यार्थी भर्नाका लागि सञ्चालन हुने प्रवेश परीक्षाको आवेदन फाराम असार ३ गतेदेखि अनलाइनमार्फत खुल्ने जनाएको छ।

सूचनाअनुसार प्रवेश परीक्षा सूचना प्रविधिमा आधारित कम्प्युटर प्रणाली (Computer-Based Test) मार्फत सञ्चालन हुनेछ। इच्छुक विद्यार्थीहरूले प्रवेश परीक्षाको आवेदन फाराम प्रवेश परीक्षा वेबसाइटमा गएर भर्न सक्नेछन्। आवेदन फाराम भर्ने प्रक्रिया असार ३ गते बिहान १० बजेदेखि सुरु हुने जनाइएको छ।

प्रवेश परीक्षा असार २८ गतेदेखि सञ्चालन हुने बोर्डले जनाएको छ। परीक्षाको विस्तृत कार्यतालिका, आवेदनको अन्तिम मिति, परीक्षा केन्द्र, सिफ्ट तथा अन्य आवश्यक जानकारी छुट्टै प्रकाशित गरिने बताइएको छ।

IOE का अनुसार प्रवेश परीक्षामा सहभागी हुन १०+२ विज्ञान, PCL विज्ञान वा इन्जिनियरिङ डिप्लोमा तह उत्तीर्ण गरेका विद्यार्थीहरू योग्य हुनेछन्। प्रवेश परीक्षामा गणित, भौतिकशास्त्र, रसायनशास्त्र तथा अंग्रेजी विषय समेटिनेछ।

प्रवेश परीक्षा सम्बन्धी विस्तृत जानकारी असार २ गते प्रकाशित गरिने तथा सोही मितिदेखि आधिकारिक वेबसाइटमा समेत उपलब्ध गराइने बोर्डले जनाएको छ।