विद्यार्थीको व्यक्तिगत विवरण दुरुपयोग नगर्न केन्द्रको निर्देशन

केन्द्रका अनुसार हाल विभिन्न विद्यालयबाट विद्यार्थीका व्यक्तिगत विवरणहरू अनधिकृत व्यक्ति वा संस्थालाई उपलब्ध गराइएको र त्यसबाट विद्यार्थीहरू मानसिक दबाबमा परेको भन्दै उजुरी तथा गुनासाहरू प्राप्त भएका छन्। यस विषयलाई केन्द्रले गम्भीर रूपमा लिएको जनाएको छ ।

पत्रमा विद्यार्थीहरूको व्यक्तिगत विवरणको गोपनीयता कायम गर्दै सुरक्षित शैक्षिक वातावरण निर्माण गर्न विद्यालयहरूले विशेष सतर्कता अपनाउनुपर्ने उल्लेख गरिएको छ। अभिभावकको स्पष्ट स्वीकृतिविना कुनै पनि विद्यार्थीको व्यक्तिगत विवरण बाह्य व्यक्ति वा संस्थालाई उपलब्ध नगराउन तथा यस्ता गतिविधि हुन नदिन आवश्यक सावधानी अपनाउन केन्द्रले अनुरोध गरेको छ।

यस सम्बन्धमा स्थानीय तह, शिक्षा विकास तथा समन्वय इकाइ, शिक्षा तथा खेलकुद मन्त्रालयका सचिव तथा मन्त्रीको सचिवालयलाई समेत आवश्यक समन्वय र सहजीकरणका लागि बोधार्थ पठाइएको छ ।

केन्द्रका निर्देशक नीलकण्ठ ढकालद्वारा हस्ताक्षरित उक्त निर्देशनले विद्यार्थीहरूको व्यक्तिगत सूचना संरक्षणलाई थप प्रभावकारी बनाउने विश्वास गरिएको छ।