ललितपुरको डीएभी स्कुलको चौथो तलाबाट खसेका विद्यार्थीको मृत्यु, घटनाबारे अनुसन्धान जारी

ललितपुरस्थित डीएभी स्कुलको चौथो तलाबाट खसेर एक विद्यार्थीको मृत्यु भएको छ। मृत्यु हुनेमा काठमाडौंको चाबहिल निवासी १८ वर्षीय आर्यन सिंह रहेको जिल्ला प्रहरी परिसर ललितपुरले जनाएको छ।

प्रहरीका अनुसार घटना सोमबार दिउँसो करिब १२ः३० बजे भएको हो। चौथो तलाबाट खसेर गम्भीर घाइते भएका सिंहलाई तत्काल उपचारका लागि सुमेरु सिटी अस्पताल लगिएको थियो। उपचारका क्रममा साँझ करिब ६ः३० बजे चिकित्सकले उनलाई मृत घोषणा गरेका थिए।

जिल्ला प्रहरी परिसर ललितपुरका प्रवक्ता तथा प्रहरी उपरीक्षक (एसपी) गौतम मिश्रका अनुसार घटनाबारे विस्तृत अनुसन्धान भइरहेको छ। प्रारम्भिक अनुसन्धानका क्रममा उक्त घटनालाई आत्महत्यासँग जोडेर हेरिएको प्रहरीले जनाएको छ।

प्रहरी स्रोतका अनुसार विद्यालयमा जडान गरिएको सीसीटीभी फुटेजमा सिंहले आफैं हाम फालेको देखिएको छ। साथै, घटनास्थलबाट एउटा सुसाइड नोटसमेत बरामद भएको बताइएको छ।

यद्यपि, बरामद भएको नोटमा रहेको हस्तलिपि आर्यन सिंहकै हो वा होइन भन्ने विषयमा फरेन्सिक परीक्षण हुन बाँकी रहेको प्रहरीले जनाएको छ। घटनाका सम्बन्धमा थप अनुसन्धान जारी रहेको छ।