८ विश्वविद्यालयले पाउँदैछन् नयाँ उपकुलपति, सिफारिस समितिले टुंग्यायो अन्तिम सूची

देशका आठ विश्वविद्यालयमा उपकुलपति नियुक्ति प्रक्रिया अन्तिम चरणमा पुगेको छ । उपकुलपति छनोट तथा सिफारिस समितिले सम्बन्धित प्रत्येक विश्वविद्यालयका लागि तीन–तीन जना उम्मेदवारको अन्तिम सूची तयार गरेको छ । शिक्षा मन्त्रालय स्रोतका अनुसार आठवटै विश्वविद्यालयका लागि तीन–तीन जनाको नाम टुंगो लागिसकेको छ । अब ती नामहरू कुलपतिसमक्ष पेश गरिने तयारी भइरहेको छ ।

उपकुलपति नियुक्तिका लागि अन्तिम सूची तयार भएका विश्वविद्यालयमा त्रिभुवन विश्वविद्यालय, कृषि तथा वन विज्ञान विश्वविद्यालय, पोखरा विश्वविद्यालय, पूर्वाञ्चल विश्वविद्यालय, लुम्बिनी बौद्ध विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालय रहेका छन् ।

प्रचलित कानुनी व्यवस्थाअनुसार सिफारिस समितिले पेश गरेका तीन उम्मेदवारमध्येबाट प्रत्येक विश्वविद्यालयका लागि एक जनालाई कुलपतिले उपकुलपतिमा नियुक्त गर्नेछन् । मन्त्रालय स्रोतका अनुसार आवश्यक प्रशासनिक प्रक्रिया पूरा गरी नियुक्तिसम्बन्धी निर्णय छिट्टै सार्वजनिक गरिने तयारी भइरहेको छ ।

उपकुलपति छनोटका लागि आवेदन दिएका उम्मेदवारहरूको अन्तर्वार्ता तथा कार्ययोजना प्रस्तुतीकरणपछि समितिले प्रत्येक विश्वविद्यालयका लागि अन्तिम तीन–तीन जनाको नाम छनोट गरेको हो ।