कक्षा १२ पुनर्योग (Retotaling) को नतिजा सार्वजनिक : १८ हजारमध्ये १२७ विद्यार्थी मात्रै उत्तीर्ण

काठमाडौं । राष्ट्रिय परीक्षा बोर्डले कक्षा १२ को वार्षिक परीक्षाको पुनर्योग (Retotaling) नतिजाको पहिलो चरण सार्वजनिक गरेको छ। बोर्डले झण्डै ३४ हजार पुनर्योग निवेदनमध्ये पहिलो चरणमा एनजी (अनुत्तीर्ण) भएका १८ हजार २ सय विद्यार्थीको मात्रै नतिजा सार्वजनिक गरेको हो ।

सार्वजनिक नतिजाअनुसार १८ हजार २ सय अनुत्तीर्ण विद्यार्थीमध्ये १२७ जनाको मात्र ग्रेड परिवर्तन भई उत्तीर्ण भएका छन् ।

बोर्डका परीक्षा नियन्त्रक कृष्ण शर्माका अनुसार साउन २ र ३ गते सञ्चालन हुने ग्रेडवृद्धि परीक्षामा विद्यार्थी सहभागी हुन पाउने व्यवस्था मिलाउन अनुत्तीर्ण भएका विद्यार्थीको पुनर्योग नतिजालाई प्राथमिकतामा राखेर सार्वजनिक गरिएको हो। पुनर्योगपछि उत्तीर्ण भएका विद्यार्थीले अब ग्रेडवृद्धि परीक्षा दिनुपर्ने छैन ।

राष्ट्रिय परीक्षा बोर्डले बुधबार जारी गरेको सूचनाअनुसार वैशाख १४ गतेदेखि जेठ २७ गतेसम्म पुनर्योगका लागि निवेदन दिएका एनजी प्राप्त विद्यार्थीहरूको नतिजा पुनर्योग उपसमितिको सिफारिस तथा परामर्श समितिको निर्णयअनुसार सार्वजनिक गरिएको हो। साथै, ग्रेड परिवर्तन भएका विद्यार्थीले नतिजा प्रकाशित भएको मितिले १० दिनपछि सम्बन्धित बोर्ड कार्यालयमार्फत सक्कल ग्रेडसिट प्राप्त गर्न सक्ने बोर्डले जनाएको छ ।

परीक्षा नियन्त्रक शर्माले झण्डै ३४ हजारमध्ये बाँकी करिब १६ हजार विद्यार्थीको पुनर्योग नतिजा भने पछि सार्वजनिक गरिने जानकारी दिए। ती विद्यार्थीले ग्रेड चित्त नबुझेर पुनर्योगका लागि निवेदन दिएका हुन् ।