कोरियन भाषा परीक्षाका लागि आवेदन खुला: कुन क्षेत्रमा कति कोटा, कस्ता प्रश्न सोधिन्छन् ?

दक्षिण कोरियामा रोजगारीका लागि जाने इच्छुक नेपाली युवाहरूलाई लक्षित गर्दै सन् २०२६ को रोजगार अनुमति प्रणाली (ईपीएस) अन्तर्गत पहिलो चरणको कोरियन भाषा परीक्षा (EPS-TOPIK) को आवेदन खुला गरिएको छ । वैदेशिक रोजगार विभाग अन्तर्गतको ई.पी.एस. कोरिया शाखा, ग्वार्को ललितपुरले सोमबार एक सूचना जारी गर्दै फारम भर्नेबारे विस्तृत विवरण सार्वजनिक गरेको हो ।
युवा, श्रम तथा रोजगार मन्त्रालय र दक्षिण कोरियाको रोजगार तथा श्रम मन्त्रालयबीच भएको समझदारी पत्र (MOU) अनुसार यसपटक विभिन्न चार वटा क्षेत्रका लागि कुल ७ हजार २०० जना नेपाली श्रमिक उत्तीर्ण गराइने अनुमानित कोटा तोकिएको छ ।

कुन क्षेत्रमा कति कोटा ?

एचआरडी कोरियाले पठाएको माग अनुसार सबैभन्दा बढी उत्पादनमूलक (म्यानुफ्याक्चरिङ) क्षेत्रका लागि ५ हजार जनाको कोटा छुट्याइएको छ । त्यसैगरी कृषि तथा पशुपालन क्षेत्रका लागि २ हजार, सेवा क्षेत्रका लागि १ सय र वन क्षेत्रका लागि १ सय जनाको कोटा तोकिएको ईपीएस कोरिया शाखाले जनाएको छ ।

आवेदन दिने समय र प्रक्रिया

ईपीएस शाखाका अनुसार इच्छुक आवेदकहरूले साउन ११ देखि साउन १७ गते अर्थात् (जुलाई २७ देखि अगस्ट २, २०२६) सम्म अनलाइनमार्फत फारम भर्न सक्नेछन् । परीक्षा फारम विभागको आधिकारिक वेबसाइट (eoers.epsnepal.gov.np) मा गई भर्न सकिनेछ ।परीक्षा शुल्क २८ अमेरिकी डलर तोकिएको छ । फारम भर्ने दिन नेपाल राष्ट्र बैंकले तोकेको विदेशी विनिमय दरका आधारमा हुन आउने नेपाली रुपैयाँ अनलाइन भुक्तानी प्रणालीमार्फत बुझाउनुपर्नेछ ।

योग्यता र मापदण्ड

आवेदन भर्नका लागि १८ वर्ष पूरा भई ३९ वर्ष ननाघेको (अर्थात् सन् १९८६ जुलाई २८ देखि सन् २००८ जुलाई २७ सम्म जन्मिएका) नेपाली नागरिक हुनुपर्नेछ । यसैगरी, फौजदारी अभियोगमा अदालतबाट सजाय नपाएको, कोरियामा गैर-कानूनी रूपमा बसोबास गरी निष्कासित नगरिएको, नेपाल सरकारले अन्य मुलुक जान रोक नलगाएको र कोरियामा E-9 वा E-10 भिसामा ५ वर्ष वा सोभन्दा बढी नबसेको हुनुपर्ने मापदण्ड तोकिएको छ । साथै, आवेदकहरूमा रङ छुट्याउन नसक्ने (Color Blindness/Weakness) समस्या हुन नहुने सूचनामा उल्लेख छ ।

कस्तो छ परीक्षा प्रणाली ?

परीक्षा ललितपुरको भैँसीपाटीस्थित UBT भवनमा UBT (Ubiquitous Based Test) प्रणालीमार्फत दैनिक ५ शिफ्टमा सञ्चालन हुनेछ। परीक्षामा पढाइ (Reading) र सुनाइ (Listening) गरी कुल ४० वटा वस्तुगत बहुउत्तर (MCQ) प्रश्नहरू सोधिनेछन्, जसको कूल पूर्णाङ्क १०० र समय ५० मिनेट रहनेछ ।पहिलो चरणको भाषा परीक्षा उत्तीर्ण गरेपछि दोस्रो चरणको सीप परीक्षण (Skill Test) र कार्यक्षमता मूल्याङ्कन (Job Capacity Assessment) उत्तीर्ण गरेपछि मात्र अन्तिम छनोट सूचीमा पर्न सकिनेछ । ईपीएस शाखाले परीक्षामा म्यानुअल्ली चीट गर्ने, मोबाइल वा अन्य इलेक्ट्रोनिक उपकरण लैजाने वा अर्काको नाममा परीक्षा दिने/दिने गराउने परीक्षार्थीलाई ४ वर्षका लागि परीक्षामा प्रतिबन्ध लगाइने र कानूनी कारबाहीका लागि नाम आमसञ्चार माध्यमबाट सार्वजनिक गरिने चेतावनी दिएको छ ।

साथै, कोरियन भाषा परीक्षा उत्तीर्ण हुँदैमा कोरियामा रोजगारीको शतप्रतिशत सुनिश्चितता नहुने स्पष्ट पार्दै बिचौलियाको प्रलोभनमा नपर्न पनि विभागले सबैलाई सचेत गराएको छ ।