डा. गोविन्द केसीसँग वार्ताका लागि शिक्षा मन्त्रालयका सचिव धनगढी पुगे

काठमाडौं । धनगढीमा सत्याग्रह गरिरहेका डा. गोविन्द केसीसँग वार्ता गर्न शिक्षा, विज्ञान तथा खेलकुद मन्त्रालयका सचिव चूडामणि पौडेल शनिबार धनगढी पुगेका छन् ।

शिक्षामन्त्री सस्मित पोखरेलको निर्देशनमा सचिव पौडेललाई वार्ताका लागि धनगढी पठाइएको हो। यसअघि शुक्रबार साँझ शिक्षामन्त्री पोखरेलले डा. केसीसँग टेलिफोनमार्फत संवाद गरेका थिए। त्यसपछि वार्ताबाट अनशनको सहमतिपूर्ण निकास खोज्ने उद्देश्यले सचिव पौडेललाई त्यहाँ पठाइएको मन्त्रालय स्रोतले जनाएको छ।

यसैबीच, प्रधानमन्त्रीका स्वास्थ्य सल्लाहकार डा. जेपी अग्रवाल र स्वास्थ्य तथा जनसंख्या मन्त्रालयका सचिव पनि आइतबार धनगढी पुगेर डा. केसीसँग छलफल गर्ने कार्यक्रम रहेको छ।

सरकारले वार्तामार्फत डा. केसीको सत्याग्रहको सहमतिपूर्ण समाधान खोज्ने प्रयासलाई तीव्र बनाएको जनाएको छ।