कक्षा १२ को मौका (पूरक) परीक्षाको नतिजा सार्वजनिक

काठमाडौं । राष्ट्रिय परीक्षा बोर्डले कक्षा १२ को मौका (पूरक) परीक्षाको नतिजा सार्वजनिक गरेको छ। बोर्डले साउन २ र ३ गते सञ्चालन गरेको परीक्षाको नतिजा बिहीबार सार्वजनिक गरेको हो।

बोर्डका अनुसार परीक्षामा कुल ७१ हजार ३१० परीक्षार्थी सहभागी भएका थिए। तीमध्ये ५७ हजार ८९७ विद्यार्थी सबै विषयमा ग्रेड प्राप्त गर्न सफल भएका छन्, जुन कुल परीक्षार्थीको ८१.१९ प्रतिशत हो।

यस्तै, बोर्डले तीन जना परीक्षार्थीको नतिजा रद्द गरेको जनाएको छ।

परीक्षाफल राष्ट्रिय परीक्षा बोर्डको वेबसाइट www.neb.gov.np, exam.neb.gov.np, studentportal.neb.gov.np तथा एसएमएस र आईभीआर सेवामार्फत हेर्न सकिने बोर्डले जनाएको छ।

बोर्डका अनुसार मौका (पूरक) परीक्षामा कम्तीमा डी ग्रेड प्राप्त गरेका परीक्षार्थीले नतिजा प्रकाशित भएको मितिले १० दिनपछि ट्रान्सक्रिप्ट, माइग्रेसन तथा प्रोभिजनल प्रमाणपत्रका लागि आवेदन दिन सक्नेछन्। साथै, नतिजाप्रति चित्त नबुझेका परीक्षार्थीले साउन २४ गतेदेखि ३१ गतेसम्म प्रतिविषय रु. १,००० शुल्क तिरेर अनलाइनमार्फत पुनर्योग (Retotaling) का लागि आवेदन दिन सक्ने व्यवस्था गरिएको बोर्डले जनाएको छ।