कक्षा १२ को नतिजा भ्याए आजै नभ्याए भोलिसम्म सार्वजनिक गर्ने बोर्डको तयारी

काठमाडौं । राष्ट्रिय परीक्षा बोर्डले कक्षा १२ को परीक्षाको नतिजा सार्वजनिकका लागि अन्तिम तयारी गरेको छ । बोर्डका अध्यक्ष डा. महाश्रम शर्माका अनुसार केही प्राविधिक पाटोमा काम भइरहेकाले सकेसम्म आजै नसके भोलिसम्म नतिजा सार्वजनिक गर्ने तयारी रहेको जानकारी दिए ।

‘अहिले प्राविधिक पक्ष जाँच गर्ने काम भइरहेको छ यदि त्यसमा ठूलो समस्या आएन भने आज नै नतिजा सार्वजनिक गर्छौं,’ उनले भने, ‘यदि समस्या आयो भने भोलिसम्म हामी नतिजा सार्वजनिक गरिसक्छौँ ।’

बोर्ड गत वैशाख २६ गतेदेखि जेठ ४ गतेसम्म कक्षा १२ को परीक्षा सञ्चालन गरेको थियो । यस वर्ष कक्षा १२ को परीक्षामा देशभरबाट कूल ४ लाख ६७ हजार ३८९ विद्यार्थी सहभागी भएका थिए । परीक्षाका लागि देशभर १ हजार ४५७ परीक्षा केन्द्र तोकिएको थियो ।

यस्तै, ५६ हजारभन्दा बढी विद्यार्थी ग्रेड वृद्धि परीक्षामा सहभागी भएका थिए ।