१३ महिनामैं त्रिभुवन विश्वविद्यालयका उपकुलपति प्रा.डा. बरालद्वारा राजीनामा

काठमाडौं—उपकुलपति पद सम्हालेको १३ महिनामैं त्रिभुवन विश्वविद्यालयका उपकुलपति प्रा.डा. केशरजंग बरालले राजीनामा दिएका छन् । त्रिवि स्रोतकाअनुसार करार र आंशिक प्राध्यापक र कर्मचारी दबाब झेल्न नसकेपछि उनले शुक्रबार राजीनामा पत्र प्रधानमन्त्री तथा विश्वविद्यालयका कुलपतिलाई पठाएका हुन् ।

प्रा.डा. बराल १० फागुन २०८० मा त्रिभुवन विश्वविद्यालयका उपकुलपति नियुक्त भएका थिए । तत्कालीन प्रधानमन्त्री पुष्पकमल दाहालले उनलाई उपकुलपतिमा नियुक्त गरेका थिए ।

त्रिविमा प्राध्यापक र कर्मचारी गरी झण्डै १ हजार ४०० सय कर्मचारी करारमा छन् । उनीहरुले स्वतः स्थायी गर्नुपर्ने माग गर्दै आएका छन् । सर्वोच्च अदालतले भने खुला प्रतिस्पर्धाबाट पदपूर्ति गर्न भनेको छ ।

प्रा.डा. बरालको राजीनामा भने स्वीकृत भइसकेको छैन । उपकुलपतिको कार्यकाल ४ वर्षको भएपनि उनी एक वर्षमै बाहिरिएका हुन् ।