बालेनको अर्को एक्सन-महानगरभित्रका निजी विद्यालयले शिक्षकलाई सरकारी स्केलको तलब दिनुपर्ने

काठमाडौं—एकपछि अर्को सुधारका काम गरेर चर्चा कमाइरहेका काठमाडौं महानगरपालिकाका मेयर बालेन्द्र शाहले महानगरपालिकाभित्र संचालित निजी विद्यालयका शिक्षकलाई पनि सरकारीसरह तलब सुविधा दिन निर्देशन दिएका छन् । बिहीबार उनले संस्थागत विद्यालयका शिक्षकहरुलाई कम तलब दिने गरेको गुनासो आउने गरेको उल्लेख गर्दै सरकारी शिक्षकसरह तलब सुविधा निद निर्देशन दिएका छन् ।

‘शिक्षा ऐन, २०२८ ’ को दफा १२(७) (छ) मा संस्थागत विद्यालयको शिक्षकलाई पनि नेपाल सरकारले तोकिदिएको तलब स्केल नघटाई तलब दिनुपर्ने’ भनी उल्लेख गरिएको छ,’ उनले भनेका छन् ।

‘यस्तै काठमाडौं महानगरपालिका विद्यालय शिक्षा व्यवस्थापन नियमावली, २०७४ को नियम ६८ मा शिक्षक तथा कर्मचारीको तलब भत्ता, निवृत्तीभरण, उपदानलगायतका अन्य सुविधा खाइपाइ आएकोमा नघट्ने गरी संघीय शिक्षा कानुनमा तोकिए बमोजिम हुने उल्लेख गरिएको छ,’ उनले अगाडि थपेका छन् ।

मेयर बालेनले कानुन बमोजिम तलब सुविधा प्राप्त नभएमा काठमाडौं महानगरपालिका शिक्षा विभागमा सम्पर्क गर्न शिक्षकहरुलाई आग्रह गरेका छन् । उनले काठमाडौं महानगरपालिकाका सामुदायिक विद्यालयका शिक्षकहरुले प्राप्त गर्ने तलब सुविधा पनि सार्वजनिक गरेका छन् ।