नवनियुक्त शिक्षामन्त्री मन्त्रालयमै सुत्ने, सेक्युरिटी पनि नलिने

काठमाडौं—नवनियुक्त शिक्षा विज्ञान तथा प्रविधि मन्त्रीमा वैज्ञानिक महावीर पुनले पद्भार ग्रहण गरेका छन् । मंगलबार राष्ट्रपति रामचन्द्र पौडेलबाट पद तथा गोपनीयताको सपथ ग्रहण गरेलगतै पुनले केशरमहलस्थित शिक्षा मन्त्रालयमा पुगेर पदभार ग्रहण गरेका हुन् ।

पुनले आफू जहाँ काम गर्छु त्यही बस्ने भन्दै मन्त्रालयमै खाटको व्यवस्था गर्न भनेका छन् । ‘अहिलेसम्म म जहाँ काम गर्छु, त्यही बस्ने गरेको छु,’ उनले भने, ‘मलाई यही मन्त्रालयको एक कोठामा खाटको व्यवस्था गर्नुहोला, यही सुत्छु ।’ उनले आफू खाना पनि मन्त्रालयमै खाने बताए ।

नवनियुक्त शिक्षामन्त्री पुनले आफूले सरकारी गाडी सरकारी कामका लागि मात्रै प्रयोग गर्ने बताए । उनले सरकारले उपलब्ध गराउने सेक्युरिटी पनि आफूले नलिने घोषणा गरे ।