अध्ययन बिदा दुरुपयोग गर्ने प्राध्यापकबाट १० करोड ४६ लाख रुपैयाँ फिर्ता

काठमाडौँ । अध्ययन बिदा लिएर सेवामा नफर्किएका प्राध्यापकहरूबाट हालसम्म १० करोड ४६ लाख रुपैयाँभन्दा बढी रकम फिर्ता भएको शिक्षा तथा खेलकुद मन्त्रालयले जनाएको छ।

शिक्षा तथा खेलकुदमन्त्री सस्मिता पोखरेलका अनुसार मन्त्रालयको पहल र त्रिभुवन विश्वविद्यालयको सक्रियतामा रकम असुलीको प्रक्रिया अघि बढाइएको हो। थप प्राध्यापकहरू पनि रकम फिर्ता गर्ने प्रक्रियामा रहेको मन्त्रालयले जनाएको छ।

मन्त्री पोखरेलले अध्ययन बिदा सार्वजनिक लगानीबाट प्रदान गरिने विशेष सुविधा भएकाले त्यसको दुरुपयोग गरी सेवामा नफर्किने प्रवृत्तिले विश्वविद्यालयलाई आर्थिक, शैक्षिक र नैतिक क्षति पुर्‍याएको बताएकी छन्।

मन्त्रालयका अनुसार छानबिन तथा कानुनी प्रक्रियापछि रकम फिर्ता हुने क्रम तीव्र बनेको छ। यसले सार्वजनिक उत्तरदायित्व, संस्थागत अनुशासन र उच्च शिक्षा प्रणालीप्रतिको विश्वास सुदृढ गर्न सहयोग पुग्ने विश्वास मन्त्रालयको छ।