‘ड्रिम एण्ड डिसिप्लिन’को सन्देशसहित सम्पन्न भयो विनायक सिद्धको अभिमुखीकरण कार्यक्रम

काठमाडौं । चावहिलस्थित विनायक सिद्ध कलेजले कक्षा ११ मा भर्ना भएका विद्यार्थीका लागि अभिमुखीकरण कार्यक्रम सम्पन्न गरेको छ । सोमबार प्रदर्शनीमार्गस्थित नेपाल पुलिस क्लबको सभाहलमा आयोजित कार्यक्रममा कलेजले नवआगन्तुक विद्यार्थीलाई स्वागत गर्दै अभिमुखीकरण गरेको हो ।

कार्यक्रममा नबिल बैंकका प्रमुख कार्यकारी अधिकृत मनोज ज्ञवाली प्रमुख अतिथिका रूपमा सहभागी थिए । उनले करिअर छनोटका क्रममा धेरै विकल्प र अन्योल आउन सक्ने भएकाले सोचविचार गरेर निर्णय लिन विद्यार्थीलाई सुझाव दिए ।

विद्यार्थीलाई प्रेरित गर्दै उनले भने, “एसईईसम्म तपाईंले के गर्नुभयो वा गर्नुभएन भन्ने कुरा अब बिर्सिनुहोस् । अब तपाईंहरूको जीवनको नयाँ यात्रा सुरु भएको छ । यो समयलाई उज्ज्वल भविष्य बनाउनका लागि राम्रोसँग उपयोग गर्नुहोस् ।” उनले आफ्नो सफलताका अनुभव पनि विद्यार्थीसँग साझा गरेका थिए ।

कार्यक्रममा नेपाली फुटबलर प्रीति राई भर्चुअल माध्यमबाट सहभागी भएकी थिइन् । हाल विनायक सिद्ध कलेजमा स्नातक तह तेस्रो वर्षमा अध्ययनरत राई खेलका लागि कम्बोडियामा रहेकी छन् । उनले कक्षा ११ मा भर्ना भएका विद्यार्थीलाई शुभकामना दिँदै विनायक सिद्धले पढाइसँगै विद्यार्थीको प्रतिभालाई पनि महत्व दिने गरेको बताइन् ।

“विनायक सिद्ध कलेज पढाइमा मात्र नभई विद्यार्थीको प्रतिभा पहिचानमा पनि अब्बल छ,” उनले भनिन्, “यहाँ भर्ना भएर कसैले पनि पछुताउनुपर्ने अवस्था आउँदैन भन्नेमा म विश्वस्त छु ।”

कार्यक्रममा कलेजका कोअर्डिनेटर विनय सिंखडाले विभिन्न फ्याकल्टीको परिचय गराउँदै ‘विनायक सिद्ध नै किन ?’ भन्ने विषयमा आफ्नो धारणा राखेका थिए । उनले कक्षा ११ र १२ केवल दुई वर्षको पढाइ मात्र नभई व्यक्तित्व र सोच विकास गर्ने महत्वपूर्ण समय भएको बताए ।

“सफलता केवल प्रतिभाले मात्र प्राप्त हुँदैन,” उनले भने, “अनुशासन, निरन्तर मेहनत र इमान्दारिताले सफलता हासिल गर्न मद्दत गर्छ ।”

कार्यक्रममा एसईई डान्स च्याम्पियनसिपको छैटौं संस्करणकी विजेता ज्यास्मिन कार्कीलाई सम्मान गरिएको थियो ।

कलेजका एकेडेमिक कन्सल्ट्यान्ट गोविन्द घिमिरेले विद्यार्थीको आचारसंहिता प्रस्तुत गरेका थिए । उनले शिक्षा कुनै गन्तव्य नभई निरन्तर यात्रा भएको बताउँदै अभिमुखीकरण कार्यक्रमले आगामी दुई वर्षमा के गर्ने र के नगर्ने भन्नेबारे मार्गदर्शन गर्ने बताए ।

क्याम्पस प्रमुख रामकृष्ण सिंखडाले कलेजको समग्र जानकारी दिँदै विद्यार्थीले ‘ड्रिम एन्ड डिसिप्लिन’ अर्थात् सपना र अनुशासनलाई साथमा लिएर अघि बढ्नुपर्ने बताए ।

“दुई वर्ष कहिले बित्छ, थाहा नै हुँदैन,” उनले भने, “यदि तपाईंसँग सपना छैन भने कुन दिशामा अघि बढ्ने भन्ने अन्योल हुन्छ । त्यसैले सबैभन्दा पहिले तपाईंको सपना स्पष्ट हुनुपर्छ ।”

उनले कलेजले विद्यार्थीको क्षमता र प्रतिभा पहिचान गरेर त्यसलाई निखार्न निरन्तर प्रयास गरिरहेको बताए ।

कार्यक्रममा प्रोग्रेसिभ स्कुलका प्रिन्सिपल तथा कलेजका बोर्ड सदस्य विष्णु पराजुलीले विद्यार्थीलाई सपथ गराएका थिए ।

कार्यक्रमका सभापति नारायण नेपालले जीवनमा सफल हुन भगवान्, आमाबुबा र शिक्षकको आशीर्वाद महत्वपूर्ण हुने बताए ।

कार्यक्रममा सांगीतिक क्षेत्रका कलाकारका साथै कलेजका विद्यार्थीले पनि विभिन्न प्रस्तुति दिएका थिए ।