चिकित्सा शिक्षा आयोगको उपाध्यक्षमा प्रा.डा. देवेन्द्र खत्री नियुक्त

काठमाडौं । चिकित्सा शिक्षा आयोगको उपाध्यक्षमा प्रा.डा. देवेन्द्र खत्री नियुक्त भएका छन्।

१८ असारमा बसेको मन्त्रिपरिषद् बैठकले प्रा.डा. खत्रीलाई आयोगको उपाध्यक्ष नियुक्त गर्ने निर्णय गरेको शिक्षा तथा खेलकुद मन्त्रालयले जनाएको छ । नियुक्तिपछि शिक्षा तथा खेलकुद मन्त्री सस्मित पोखरेलले मंगलबार प्रा.डा. खत्रीलाई नियुक्तिपत्र हस्तान्तरण गरेका हुन् ।

प्रा.डा. खत्री नेपाली सेना स्वास्थ्य विज्ञान संस्थानका पूर्व प्रिन्सिपल तथा वरिष्ठ मुटुरोग विशेषज्ञ हुन् । कन्सल्ट्यान्ट इन्टरभेन्सन कार्डियोलोजिस्टका रूपमा उनले एन्जियोप्लास्टी, स्टेन्ट प्रत्यारोपण तथा मुटु फेल हुने समस्याको उपचार र व्यवस्थापनमा विशेष अनुभव हासिल गरेका छन्।

यसअघि आयोगका तत्कालीन उपाध्यक्ष प्रा.डा. अन्जनीकुमार झा सार्वजनिक पदाधिकारीको पदमुक्तिसम्बन्धी विशेष व्यवस्था गर्ने अध्यादेश लागू भएपछि गत वैशाखमा पदमुक्त भएका थिए। त्यसपछि आयोगको नियमित काम प्रभावित बनेको भन्दै सरकारले संस्थापक उपाध्यक्ष प्रा.डा. श्रीकृष्ण गिरीलाई आयोगको जिम्मेवारी दिएको थियो ।

नयाँ उपाध्यक्ष नियुक्त भएसँगै चिकित्सा शिक्षा आयोगका नीति निर्माण, नियमन तथा प्रशासनिक कार्यहरू थप प्रभावकारी रूपमा अघि बढ्ने अपेक्षा गरिएको छ ।