कक्षा १२ को परीक्षा तालिका सार्वजनिक, कुन विषयको परीक्षा कहिले ?

काठमाडौं । कक्षा १२ को परीक्षा तालिका सार्वजनिक भएको छ । राष्ट्रिय परीक्षा बोर्ड, परीक्षा नियन्त्रण कार्यालय (कक्षा ११ र १२) ले आज आइतबार परीक्षा तालिका सार्वजनिक गरेको हो ।

बोर्डले सार्वजनिक गरेको तालिकाअनुसार २०८० साल वैशाख २६ गतेबाट परीक्षा शुरु हुने जनाइएको छ । पहिलो दिन अनिवार्य अंग्रेजी, संस्कृत रचना, वौद्ध शिक्षा, उर्दु व्याकरण र साहित्य, अनिवार्य वैकल्पिक संस्कृत रचना लगायतका विषय रहेको परीक्षा हुनेछ ।

परीक्षा जेठ ५ गतेसम्म चल्ने परीक्षा बिहान ८ बजेदेखि ११ बजेसम्म चल्ने जनाइएको छ ।

परीक्षामा साधारण/परम्परागत धारतर्फ रजिष्ट्रेशन नम्बरको शुरुका दुई अंक ७८ र ७९ हुने ग्रेडवृद्धि तथा नियमित परीक्षार्थीहरुले नयाँ पाठ्यक्रम अनु्सार परीक्षामा सहभागि हुनु पर्ने बोर्डले जनाएको छ । यस्तै, अन्य ग्रेड वृद्धि/आंशिक परीक्षार्थीहरु (रजिष्ट्रेसन नम्बर शुरुका दुई अंक ७२, ७३, ७४, ७५, ७६ र ७७ हुने) ले पुरानो पाठ्यक्रमअनुसार परीक्षा दिनुपर्ने जनाइएको छ ।

यसैगरी, प्राविधिक धारतर्फका नियमित परीक्षार्थीहरु (रजिष्ट्रेशन नम्बरको शुरुका दुई अंक ७९ हुने ) ले प्राविधिक धारतर्फको नयाँ पाठ्यक्रमअनुसार परीक्षामा सहभागी हुनु पर्ने तथा सो बाहेक अन्य ग्रेडवृद्धि/आंशिक परीक्षार्थीहरु (रजिष्ट्रेशन नम्बरका शुरुका दुई अंक ७२, ७३, ७४, ७५, ७६, ७७ र ७८ हुने) ले पुरानो पाठ्यक्रम अनुसार परीक्षा दिनु पर्ने बोर्डले जनाएको छ ।