तिलोत्तमाका मेयर खाँणले आफ्नो तलबबाट दिए १४६ जना विद्यार्थीलाई छात्रवृत्ति

काठमाडौं– तिलोत्तमा नगरपालिकाका मेयर रामकृष्ण खाँणले आफूले पाउने पारिश्रमिक तथा सेवा सुविधाबाट आउने रकमबाट विद्यार्थीलाई छात्रवृत्ति प्रदान गरेका छन् । खाँणले नगरभित्रका ४२ सामुदायिक विद्यालयका १ सय ४६ विद्यार्थीलाई छात्रवृत्ति प्रदान गरेका हुन् ।

मेयर खाँणले आफूले वर्षभरी पारिश्रमिक रकमबाट प्रति विद्यार्थी ५ हजारका दरले ७ लाख ३० हजार छात्रवृत्ति वितरण गरेका हुन् ।

यसअघि तिलोत्तमाकै पूर्वमेयर बासुदेव घिमिरेले पनि आफूले पाउने मासिक पारिश्रमिक र सेवा सुविधाको रकमबाट सामुदायिक विद्यालयका विद्यार्थीलाई छात्रवृत्ति दिएका थिए । अहिलेका मेयर खाणले यसलाई निरन्तरता दिएका हुन् ।

मेयर खाणले निर्वाचित भएको वर्षदेखि नै आफूले पाउने पारिश्रमिकवापतको रकमबाट छात्रवृत्ति वितरण गर्दै आएका छन् ।

उनले यस रकमले पढ्ने इच्छा भएर पनि बीचमै पढाइ रोक्नुपर्ने बाध्यता आउन सक्ने विद्यार्थीले भविष्य बनाउन पाउने भएकाले यो अवसर प्रदान गरेको बताए ।