कक्षा १२ को परीक्षा सार्न प्रधानमन्त्री ओलीको निर्देशन

काठमाडौं । प्रधानमन्त्री केपी शर्मा ओलीले कक्षा १२ परीक्षा केही दिनका लागि सार्न निर्देशन दिएका छन् । परीक्षाबारे छलफल गर्न बालुवाटार पुगेका शिक्षा सचिव दिपक काफ्ले राष्ट्रिय परीक्षा बोर्डका अध्यक्ष डा. महाश्रम शर्मालाई प्रधानमन्त्री ओलीले परीक्षा सार्न निर्देशन दिएका हुन् ।

तीन सातादेखि नेपाल शिक्षक महासंघको नेतृत्वमा शिक्षकहरु राजधानीमा हड्तालमा छन् । सरकारले आफ्ना मागहरु पूरा नगरेसम्म स्कुल नफर्किने अडान शिक्षकहरुको छ ।

शिक्षकहरुकै हड्तालकाबीच मंगलबार विहान बसेको बोर्डको बैठकले भने ११ बैशाखदेखि नै कक्षा १२ को परीक्षा गर्ने निर्णय गरेको थियो । बोर्डका पदाधिकारीहरुबीच शिक्षकहरु परीक्षाका लागि तयार नभएर कर्मचारीबाट परीक्षा गर्ने विकल्पमा यो निर्णय गरेको थियो ।

तर, प्रधानमन्त्री ओलीले भने केही दिनका लागि परीक्षा सार्न निर्देशन दिएका हुन् ।