शिक्षा विधेयकमा असन्तुष्टि जनाउँदैं शिक्षक महासंघद्वारा आन्दोलनका कार्यक्रम घोषणा

काठमाडौं—शिक्षक महासंघले शिक्षा विधेयकमा महासंघका मागहरु सम्बोधन नभएको भन्दैं चरणवद्ध आन्दोलनका कारण घोषणा गरेको छ । शुक्रबार काठमाडौंमा पत्रकार सम्मेलनको आयोजना गर्दै महासंघले ९ भदौदेखि चरणवद्ध आन्दोलनको घोषणा गरेको छ ।

महासंघले पहिलो चरणमा ९ भदौमा प्रधानमन्त्री, शिक्षामन्त्री र राजनीतिक दलका प्रमुख सचेतकलाई ध्यानाकर्षण पत्र बुझाएर आन्दोलन सुरु गर्ने जनाएको छ । ११ भदौंमा सबै राजनीतिक दलका केन्द्रीय कार्यलयमा ध्यानाकर्षण पत्र बुझाउने, कार्यलहरुमै २ घण्टा प्रतिनिधीमूलक धर्ना दिने कार्यक्रमको महासंघले घोषणा गरेको छ ।

१३ भदौंमा सबै पालिकामा प्रतिनिधिमूकल उपस्थितीमा ध्यानाकर्षण पत्र बुझाउने, १५ भदौमा सबै जिल्ला समन्वय समितिमा प्रतिनिधिमूलक ध्यानाकर्षण पत्र बुझाउने र २ घण्टा धर्ना दिने महासंघले जनाएको छ ।

२१ भदौंमा दोस्रो चरणको आन्दोलन घोषणा गर्ने र त्यो आन्दोलनमा विरोध प्रदर्शनलगायतका कडा संघर्षका कार्यक्रम ल्याउने महासंघले जनाएको छ ।

महासंघले शिक्षा समितिबाट पारित भएको विधेयकले आफूहरुका मागहरु आंशिक रुपमा मात्रै पूरा गरेको भन्दैं आन्दोलनको कार्यक्रम सार्वजनिक गरेको हो । प्रस्तावित शिक्षा विधेयक शिक्षकविरोधी र आफूहरुसँगको सहमतिअनुसार नभएको भन्दै विधेयक तत्काल फिर्ता गर्न पनि महासंघले माग गरेको छ ।

बिहीबार संसदीय समितिले शिक्षा विधेयक पास गरेको थियो ।