अरूको नाममा एसईई दिने नक्कली परीक्षार्थी मकवानपुरमा पक्राउ

काठमाडाैं । हेटाैंडामा माध्यमिक शिक्षा परीक्षा (एसईई)का क्रममा अर्काको नाममा परीक्षा दिन आएको एक नक्कली परीक्षार्थीलाई प्रहरीले नियन्त्रणमा लिएको छ।

शुक्रबार बिहान करिब ८ बजेतिर हेटौँडा–१० भुटनदेवीस्थित सोलिड्यारेटी माध्यमिक विद्यालयमा सञ्चालन भइरहेको परीक्षा केन्द्रमा शंकास्पद गतिविधि देखिएपछि प्रहरीले उनलाई पक्राउ गरेको हो।

जिल्ला प्रहरी कार्यालय मकवानपुरका अनुसार पक्राउ पर्नेमा सिन्धुली जिल्लाको मरिन गाउँपालिका–४ स्थायी घर भएका तथा हाल हेटौँडा–४ स्थित हेटौँडा स्कुल अफ म्यानेजमेन्ट कलेजमा कक्षा ११ मा अध्ययनरत १८ वर्षीय बिराज विक रहेका छन्।

प्रहरीको प्रारम्भिक अनुसन्धानका क्रममा विकले अर्का व्यक्तिको प्रवेशपत्रमा आफ्नो फोटो टाँसेर परीक्षा दिन आएको खुलेको छ। उनले हेटौँडा उपमहानगरपालिका–१२ पदमपोखरीका १९ वर्षीय अंकिश श्रेष्ठको नामको प्रवेशपत्र प्रयोग गरेको पाइएको प्रहरीले जनाएको छ।

घटनामा संलग्न विक र श्रेष्ठ दुवै जनालाई नियन्त्रणमा लिएर जिल्ला प्रहरी कार्यालय मकवानपुरमा राखी थप अनुसन्धान भइरहेको जिल्ला प्रहरी कार्यालय मकवानपुरका प्रवक्ता पुष्कर बोगटीले जानकारी दिएका छन्।