तलबका लागि महिना कुर्नु नपर्ने, सरकारी कर्मचारीलाई अब १५ दिनमै भुक्तानी

काठमाडौं । सरकारी कर्मचारीहरूले अब तलबका लागि पूरा महिना कुर्नु नपर्ने भएको छ । नेपाल सरकारले राष्ट्रसेवक सरकारी कर्मचारीहरूको तलबभत्ता सुविधा अब प्रत्येक १५ दिनमा उपलब्ध गराउने तयारी गरेको छ ।

यससम्बन्धी व्यवस्था मिलाउन अर्थ मन्त्रालयले महालेखा नियन्त्रक कार्यालयलाई पत्राचार गरेको छ । हालसम्म मासिक रूपमा भुक्तानी हुँदै आएको तलबभत्ता अब अर्धमासिक रूपमा वितरण गर्ने प्रक्रिया अघि बढाइएको मन्त्रालयले जनाएको छ ।

अर्थ मन्त्रालयको बजेट तथा कार्यक्रम महाशाखाद्वारा जारी पत्रमा वैशाख ४ गते अर्थमन्त्रीस्तरको निर्णयअनुसार नयाँ व्यवस्था कार्यान्वयन गर्न आवश्यक प्रक्रिया मिलाउन अनुरोध गरिएको उल्लेख छ ।

यो व्यवस्था लागू भएपछि सरकारी कर्मचारीहरूले महिनामा दुई पटक तलब पाउनेछन् ।