अघि बढ्यो आठ वटा विश्वविद्यालयको उपकुलपतिका नियुक्तिको प्रक्रिया

काठमाडौं—सरकारले आठ वटा विश्वविद्यालयका उपकुलपति नियुक्तिको प्रक्रिया अगाडि बढाएको छ । शुक्रबार हालै पदमुक्त भएका आठ वटा विश्वविद्यालयको रिक्त उपकुलपति नियुक्तिका लागि नाम सिफारिस गर्न गठित छनोट तथा सिफारिस समितिले उपकुलपतिका लागि दरखास्त आव्हान गरेसँगै उपकुलपति नियुक्तिको प्रक्रिया अगाडि बढेको हो ।

उपकुलपति छनोट तथा सिफारिस समितिले त्रिभुवन विश्वविद्यालय, पूर्वाञ्चल विश्वविद्यालय, पोखरा विश्वविद्यालय, लुम्बिनी वौद्ध विश्वविद्यालय, कृषि तथा वन विज्ञान विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालयको उपकुलपति छनोटका लागि दरखास्त माग गरेको हो ।

२४ बैशाखमा स्वीकृत विभिन्न विश्वविद्यालयको उपकुलपति छनोट तथा सिफारिस सम्बन्धि एकीकृत कार्यविधि, २०८३ बमोजिम दरखास्त दिन समितिले भनेको छ । इच्छुक तथा योग्य व्यक्तिलाई १० दिनभित्र शिक्षा, विज्ञान तथा प्रविधि मन्त्रालयको वेबसाइटमार्फत दरखास्त दिन सक्नेछन् ।

सरकारले त्रिभुवन विश्वविद्यालयबाहेकका ७ वटा विश्वविद्यालयका उपकुलपतिसहितका पदाधिकारीलाई अध्यादेशबाट पदमुक्त गरेको थियो । तर, त्रिभुवन विश्वविद्यालयका उपकुलपतिसहितका पदाधिकारीले भने अध्यादेश अगावैं राजीनामा दिएका थिए ।