सार्वजनिक बिदाको दिन पठनपाठन गर्ने विद्यालयलाई महानगरले कारवाही गर्ने

एजुकेशन समाचार भदौ १५, २०८० २२:१९

काठमाडौं । काठमाडौं महानगरपालिकाले सार्वजनिक विदाको दिन पठनपाठन गर्ने विद्यालयहरुलाई कारवाही गर्ने भएको छ । महानगरले आज (भदौ १५) गते सापारु र रोपाईं जात्राको अवसरमा महानगरभित्र सार्वजनिक विदा दिएको थियो । महानगरले जारी गरेको विदाको सूचना उल्लंघन गर्दै पठनपाठन गर्ने विद्यालयलहरुलाई महानगरले कारवाही गर्ने जनाएको हो ।

महानगरका शिक्षा विभाग प्रमुख सिताराम कोइरालाले एक सूचना जारी गर्दै बिदाको दिन पनि पठनपाठन गरेको भन्ने उजुरी प्राप्त भएकाले त्यस्ता विद्यालयलाई कारवाही गर्ने बताएका छन् ।

‘महानगरको बिदाको सूचनाको उल्लंघन गर्दै केही विद्यालयमा पठनपाठन गरेको भन्ने गुनासो प्राप्त भएको र उक्त विषयप्रति यस महानगरपालिकाको गम्भीर ध्यानकर्षण भएको छ,’ सूचनामा भनिएको छ, ‘स्थानीय सरकारले गरेको निर्णय अनिवार्य रुपमा पालना गर्न सबैमा अनुरोध गर्दै यो सूचना विपरित गरेमा प्रचलित कानुनबमोजिम कारवाही गर्ने व्यहोरा सम्बन्धित सबैमा सूचित गरिन्छ ।’