महानगरबाट छात्रवृत्ति पाएका विद्यार्थीले कुनै पनि शुल्क तिनुपर्दैन, द्विविधामा नपर्न अनुरोध

काठमाडौं– काठमाडौं महानगरपालिकाले पूर्ण छात्रवृत्तिका विषयमा द्विविधामा नपर्न विद्यार्थी तथा अभिभावकलाई अनुरोध गरेको छ । महानगरले कक्षा ११ र १२ मा छात्रवृत्ति प्राप्त गरेका विद्यार्थीले कुनै पनि शुल्क तिर्न नपर्ने भएकाले द्विविधामा नपर्न अनुरोध गरेको हो ।

कतिपय कलेजले महानगरबाट छात्रवृत्ति प्राप्त गरेका विद्यार्थीहरुबाट पनि शुल्क लिन खोजेको गुनासो विद्यार्थी तथा अभिभावकबाट आएको महानगरले जनाएको छ । ‘काठमाडौँ महानगरपालिकाले छात्रवृत्ति परीक्षा लिएर म्याचिङ्ग लिष्टमार्फत सिफारिस गरेका विद्यार्थीहरुले कक्षा ११ र १२ मा पूर्ण छात्रवृत्ति प्राप्त गर्छन्,’ महानगरले भनेको छ, ‘उनीहरुले भर्ना, प्रयोगशाशाला जस्ता कुनै पनि शीर्षकमा शुल्क तिर्नु पर्दैन ।’

महानगरले अघि भनेको छ, ‘कति विद्यालयले सिफारिस गरिएका विद्यार्थीहरुसँग विभिन्न शीर्षकमा शुल्क माग गरेको भन्ने गुनासो लिएर हिजोआज विद्यार्थी र अभिभावक महानगरपालिकामा आउने गर्नुभएको छ ।’
यसर्थ, छात्रवृत्ति पूर्ण निःशुल्क हो भन्ने कुरामा द्विविधा नहुन, मनोनयन पत्र बोकेर आउने विद्यार्थीलाई कुनै शुल्क नलिई भर्ना गर्न सम्बन्धित विद्यालयहरुलाई महानगरले अनुरोध गरेको छ ।

यसैगरी, छात्रवृत्ति सिफारिस भएका विद्यार्थीलाई कुनै समस्या परेमा वा जिज्ञासा भएमा विद्यालय निरीक्षक वा स्रोत शिक्षकसँग सम्पर्क गरेर सहयोग लिनसमेत महानगरको अनुरोध छ ।

कसलाई गर्ने सम्पर्क ?

महानगरले विद्यार्थी तथा अभिभावकलाई भर्ना सम्बन्धि कुनै समस्या परेको खण्डमा विद्यालय निरीक्षक, वडा, स्रोत व्यक्ति वा स्रोत शिक्षकलाई सम्पर्क गर्न भन्दै सम्पर्क नम्बर समेत उपलब्ध गराएको छ ।