शुभश्री कलेज अफ म्यानेजमेन्ट र मर्क्युर होटलबीच सम्झौता

काठमाडौं– नयाँ बानेश्वरस्थित शुभश्री कलेज अफ म्यानेजमेन्ट र सुकेधारास्थित मर्क्युर होटलबीच सम्झौता भएको छ ।

ब्याचलर अफ होटल म्यानेजेमन्ट (बीएचएम) अध्ययनरत विद्यार्थीलाई इन्टर्नशीप, रोजगारी र विभिन्न कार्यशाला गर्ने उद्देश्यले शुभश्री र मर्क्युरबीच सम्झौता गरिएको कलेजकी प्रिन्सिपल मनिता ओली बस्नेतले जानकारी दिइन् ।

साथै, विद्यार्थीहरुलाई हस्पिटालिटी सेवा र व्यवसाय व्यवस्थापनका क्षेत्रमा व्यावहारिक अनुभव प्रदान गर्नका लागि साझेदारका रुपमा मर्क्युर होटललाई रोजेको उनले बताइन् ।

गेष्ट लेक्चरर तथा विभिन्न वर्कशपअन्तर्गत होटल व्यवस्थापन, व्यवसाय सञ्चालन, पाककला साथै अन्य सम्बन्धित उद्योग विशेषज्ञहरुबाट तालिम प्रदान गरिने सम्झौता पत्रमा उल्लेख छ । कलेजले मर्क्युरसँग एक वर्षका लागि मान्य हुने गरी सम्झौता गरेको हो । आवश्यकताअनुसार नविकरण गर्दै जाने कलेजको योजना छ ।

मर्क्युर होटल एक महिनाअघिबाट सञ्चालनमा आएको पाँच तारे होटल हो । एबी होल्डिङमार्फत देशबन्धु बस्नेतले यो होटल निर्माण गरेका हुन् ।