लुटपाटमा संलग्न भनिएका डा. राई कलेजको निर्देशक नभएको सीसीआरसीको दाबी

काठमाडौं—राजावादी आन्दोलनका क्रममा भएको कोटेश्वरस्थित भाटभटेनी सुपरमार्केट लुटपाटमा संलग्न भएका भनिएका डा. राजकुमार राई क्यापिटल कलेज अफ रिसर्च सेन्टरको निर्देशक नभएको पाइएको छ । १५ फागुनमा भएको प्रदर्शनका क्रममा भाटभटेनी लुटपाटमा संलग्न भनिएका राई सीसीआरसी कलेजको समेत निर्देशक रहेको भन्दै सामाजिक सञ्जालमा भाइरल भएपछि कलेजले उनको कलेजसँग आवद्धता नभएको दावी गरेको हो ।

कलेजका प्रिन्सिपल हरिचन्द्र लामिछानेले डा. राईले सीसीआरसी छोडेको १० वर्ष भइसकेको जानकारी दिए । ‘उहाँ भूकम्पभन्दा अघि अर्थात् २०७१ सालसम्म हाम्रो कलेजमा कार्यक्रम संयोजकका रुपमा रहेको कुरा साँचो हो,’ उनले भने, ‘तर, २०७१ साल असारदेखि उहाँ कलेजको कुनैपनि भूमिकामा हुनुहुन्न ।’

लामिछानेले सामाजिक सञ्जाल र केही सञ्चारमाध्यममा एकतर्फी ढंगबाट समाचार आएको आपत्तिसमेत जनाए । ‘यो विषयमा हाम्रो गम्भीर ध्यानाकर्षण भएको छ,’ उनले भने, ‘सञ्चारमाध्यमहरु जिम्मेवार नहुँदा कतिपय अवस्थामा हामीजस्ता शैक्षिक संस्थाहरुको बदनामी हुँदो रहेछ यसतर्फ सञ्चारमाध्यहरु जिम्मेवार बन्नसमेत आग्रह गर्दछु ।’

अमेरिकाबाट पिएचडीसमेत गरेका राई राष्ट्रिय स्वतन्त्र पार्टी खोटाङको जिल्ला सभापतिसमेत हुन् । उनले चैत १५ गते कोटेश्वरको भाटभटेनीबाट महंगा ब्रान्डका ब्ल्याकलेबल, ब्यू लेबल जस्ता ह्वीस्की चोर्दै गरेको सीसीटीभी फुटेजका आधारमा उनलाई जिल्ला प्रहरी परिसर काठमाडौंले पक्राउ गरेको छ ।