एसइईपछि नतिजा पर्खिरहेका विद्यार्थीका लागि ‘इन्स्पायर सिरिज’ सुरु गर्दै मन्त्रालय

काठमाडौं । माध्यमिक शिक्षा परीक्षा (एसइई) दिएर नतिजाको प्रतीक्षामा रहेका विद्यार्थीलाई लक्षित गर्दै शिक्षा, विज्ञान तथा प्रविधि मन्त्रालय ले ‘इन्स्पायर सिरिज’ नामक विशेष कार्यक्रम सुरु गर्ने भएको छ । परीक्षा पछिको समयलाई केवल प्रतीक्षामा सीमित नराखी सिर्जनात्मक र उपयोगी बनाउन कार्यक्रम ल्याइएको सस्मित पोखरेल ले जानकारी दिएका छन् ।

मन्त्री पोखरेलले सामाजिक सञ्जालमार्फत जानकारी दिँदै एसइईपछि विद्यार्थीहरूले आफ्नो रुचि पहिचान गर्ने, नयाँ सीप सिक्ने र भविष्यको दिशा तय गर्ने उपयुक्त समय भएकाले त्यसलाई सदुपयोग गर्न आग्रह गरेका छन् ।

मन्त्रालयका अनुसार ‘इन्स्पायर सिरिज’ अन्तर्गत विभिन्न क्षेत्रका सफल व्यक्तित्वहरूले आफ्ना संघर्ष, अनुभव र सफलताका कथा विद्यार्थीसँग साझा गर्नेछन् । मन्त्रालयको सामाजिक सञ्जालमार्फत प्रसारण हुने उक्त सामग्रीले विद्यार्थीलाई नयाँ सम्भावना खोज्न, लक्ष्य निर्धारण गर्न तथा आत्मविश्वास बढाउन सहयोग पुग्ने अपेक्षा गरिएको छ ।

मन्त्री पोखरेलले परीक्षा पछिको समयलाई रचनात्मक बनाउन र आफ्नो क्षमता निखार्ने अवसरका रूपमा लिन विद्यार्थीलाई आग्रह गरेका छन् ।

एसइईपछि विद्यार्थीहरू प्रायः नतिजाको प्रतीक्षामा मात्रै सीमित रहने अवस्था देखिँदै आएको बेला मन्त्रालयले ल्याएको यो कार्यक्रमलाई सकारात्मक र समयानुकूल पहलका रूपमा हेरिएको छ ।