कक्षा १२ को परीक्षा सुरु, आज अनिवार्य अंग्रेजी

काठमाडौं । राष्ट्रिय परीक्षा बोर्डले कक्षा १२ को वार्षिक परीक्षा आजदेखि सुरु गरेको छ । बोर्डका अनुसार देशभर तथा विदेशका तोकिएका केन्द्रमा परीक्षा एकसाथ सञ्चालन भइरहेको छ । आज पहिलो दिन अनिवार्य अंग्रेजी विषयको परीक्षा भइरहेको छ ।

यस वर्ष देशभर तथा विदेशमा गरी १ हजार ५ सय २१ परीक्षा केन्द्र निर्धारण गरिएको छ । परीक्षामा कुल ४ लाख १८ हजार ८ विद्यार्थी सहभागी भएका छन् । तीमध्ये नियमिततर्फ ३ लाख ३२ हजार ७ सय ७८ र आंशिकतर्फ ८५ हजार ८ सय ३० जना रहेका छन् ।

प्रदेशगत रूपमा सबैभन्दा बढी परीक्षार्थी बागमती प्रदेश मा रहेका छन्, जहाँ १ लाख २० हजार ४ सय ७७ जना सहभागी हुँदैछन् । सबैभन्दा बढी काठमाडौं जिल्लामा ६४ हजार ३ सय ३८ जना विद्यार्थी परीक्षामा सहभागी भएका छन् ।

सबैभन्दा कम मुस्ताङ जिल्ला मा ३१ जना परीक्षार्थी रहेका छन् । त्यसैगरी सबैभन्दा बढी परीक्षा केन्द्र काठमाडौंमा १६१ वटा तोकिएको छ भने सबैभन्दा कम मुस्ताङमा १ वटा केन्द्र रहेको छ । विदेशतर्फ जापानमा १ परीक्षा केन्द्र तोकिएको छ ।

परीक्षा सञ्चालनका लागि बोर्डले ४४ हजार २ सय ४ जना जनशक्ति परिचालन गरेको जनाएको छ । बोर्डले परीक्षा व्यवस्थित, मर्यादित, शान्तिपूर्ण र निष्पक्ष रूपमा सम्पन्न हुने जनाएको छ ।