आविष्कार ‘२६’ मा इनोभेक्स एमआईटीको दोहोरो सफलता, दुई विधामा च्याम्पियन

काठमाडौं । मोडेल इन्स्टिच्युट अफ टेक्नोलोजी (MIT) अन्तर्गतको रोबोटिक्स तथा इन्टरनेट अफ थिङ्स (IoT) क्लब इनोभेक्स एमआईटी ले काठमाडौं विश्वविद्यालयद्वारा आयोजित राष्ट्रियस्तरको प्रविधि तथा नवप्रवर्तन प्रतियोगिता ‘आविष्कार ‘२६’ मा दुई विधामा प्रथम स्थान हासिल गर्दै उल्लेखनीय सफलता हात पारेको छ ।

असार २२ र २३ गते (जुलाई ७–८) काठमाडौं विश्वविद्यालयमा सम्पन्न प्रतियोगितामा इनोभेक्स एमआईटीले १५ केजी रोबो वार तथा एक्वा रश विधामा उत्कृष्ट प्रदर्शन गर्दै दुवै प्रतियोगिताको उपाधि जितेको हो ।

छोटो समयअघि मात्रै स्थापना भएको क्लबले पहिलो सहभागितामै राष्ट्रियस्तरको प्रतिष्ठित प्रतियोगितामा दोहोरो उपाधि जित्नु संस्थाका लागि महत्वपूर्ण उपलब्धि मानिएको छ । क्लबको यो सफलताले सदस्यहरूको प्राविधिक दक्षता, सिर्जनात्मक सोच, अनुसन्धानप्रतिको लगाव तथा नवप्रवर्तन क्षमतालाई उजागर गरेको छ ।

प्रतियोगितामा हासिल गरेको यो उपलब्धिले इनोभेक्स एमआईटीलाई नेपालको रोबोटिक्स तथा इन्जिनियरिङ क्षेत्रमा उदाउँदो र प्रतिस्पर्धी टोलीका रूपमा स्थापित गरेको छ । साथै, आगामी दिनमा राष्ट्रिय तथा अन्तर्राष्ट्रिय प्रतियोगितामा अझ प्रभावशाली उपस्थिति जनाउने विश्वाससमेत बढाएको छ ।

इनोभेक्स एमआईटीका सम्पूर्ण सदस्य, प्रशिक्षक तथा सहयोगी टोलीलाई उक्त सफलताका लागि बधाई ज्ञापन गर्दै आगामी यात्रामा अझ उत्कृष्ट उपलब्धि हासिल गर्न शुभकामना व्यक्त गरिएको छ ।