कक्षा १२ को नतिजा साउन महिनाभित्रै प्रकाशन गर्ने बाेर्डकाे तयारी

काठमाडौं । राष्ट्रिय परीक्षा बोर्डले कक्षा १२ को नतिजा साउन महिनाभित्रै प्रकाशन तयारी गरेको छ । बोर्डका परीक्षा नियन्त्रण कृष्ण शर्माले साउनको अन्तिम हप्तामा नतिजा सार्वजनिक गर्ने गरी काम भइरहेको एजुकेशन समाचारलाई जानकारी दिए ।

उनका अनुसार हालसम्म ७० प्रतिशत काम सम्पन्न भइसकेको छ । ‘हामीले ७० प्रतिशत काम सम्पन्न गरिसक्यौँ,’ उनले भने, ‘अब सकेसक्दो छिटो बाँकी काम सकेर यो महिनाभित्रै नतिजा सार्वजनिक गर्छौँ ।’

यतिबेला उत्तरपुस्तिकाको सम्परीक्षण भइरहेको उनले जानकारी दिए । त्यसपछि इन्ट्री, रजु, टेबुलेसन गरेर हाजिरी हेरेपछिमात्र नतिजा तयार हुने उनी बताउँछन् ।

गत वैशाख २६ गतेदेखि जेठ ५ गतेसम्म सञ्चालन भएको परीक्षामा देशभरबाट चार लाख ६७ हजार तीन सय ८९ विद्यार्थीले परीक्षा दिएका थिए । साथै, ५६ हजारभन्दा बढी विद्यार्थी ग्रेड वृद्धि परीक्षामा सहभागी भएको बोर्डले जनाएको छ ।