सरकारलाई शिक्षक महासंघको अन्तिम चेतावनी ! भदौबाट देशव्यापी आन्दोलन घोषणा (भिडियोसहित)

काठमाडौं । सरकारसँग पटक–पटक भएका सहमति कार्यान्वयन नहुँदा असन्तुष्ट बनेको नेपाल शिक्षक महासंघ फेरि आन्दोलनको मैदानमा उत्रिने भएको छ। महासंघको तेस्रो राष्ट्रिय परिषद् बैठक ले १५ बुँदे निर्णय पारित गर्दै आउँदो भदौ महिनादेखि देशव्यापी आन्दोलन सुरु गर्ने घोषणा गरेको हो। महासंघले अब आश्वासन र प्रतिबद्धताले मात्रै नपुग्ने स्पष्ट पार्दै सरकारले तत्काल माग सम्बोधन नगरे निर्णायक संघर्ष मा जाने चेतावनी दिएको छ।

शुक्रबार आयोजित पत्रकार सम्मेलनमा महासंघका अध्यक्ष लक्ष्मीकिशोर सुवेदी ले सरकारमाथि शिक्षकसँग भएको सहमति कार्यान्वयनमा गम्भीर बेवास्ता गरेको आरोप लगाए। उनले शिक्षक आन्दोलन रोकिने कि नरोकिने भन्ने कुरा अब पूर्ण रूपमा सरकारको व्यवहारमा निर्भर रहने बताए।

“सरकारले शिक्षकसँग गरेका सहमति कार्यान्वयन गरेको छैन। त्यसैले फेरि आन्दोलनमा जान बाध्य भएका छौँ। यसपटकको आन्दोलन विगतका आन्दोलनभन्दा अझ कडा र प्रभावकारी हुनेछ,” अध्यक्ष सुवेदीले भने।

महासचिव तुलाबहादुर थापा ले आन्दोलनका विस्तृत कार्यक्रम केही दिनभित्र सार्वजनिक गरिने जानकारी दिँदै सरकारले समयमै निर्णय नगरे आन्दोलन चरणबद्ध रूपमा देशभर विस्तार गरिने बताए।

महासंघले सार्वजनिक गरेको १५ बुँदे निर्णय मा विद्यालय शिक्षा ऐन तत्काल जारी गर्नुपर्ने, सरकारसँग भएका सबै सहमति कार्यान्वयन गर्नुपर्ने, प्रारम्भिक बालविकास शिक्षक, विद्यालय कर्मचारी र राहत शिक्षकका सेवा–सुविधा सुनिश्चित गर्नुपर्ने, दुर्गम तथा स्थानीय भत्ता उपलब्ध गराउनुपर्ने, अस्थायी शिक्षक–कर्मचारीका समस्या समाधान गर्नुपर्ने लगायतका माग समेटिएका छन्।

महासंघले सरकारले पटक–पटक वार्तामा प्रतिबद्धता जनाए पनि व्यवहारमा कार्यान्वयन नगरेको निष्कर्ष निकाल्दै अब आन्दोलन नै अन्तिम विकल्प बनेको जनाएको छ। शिक्षकका जायज मागप्रति सरकारले पुनः बेवास्ता गरे देशभर सशक्त आन्दोलन चर्किने र त्यसबाट उत्पन्न हुने परिस्थितिको सम्पूर्ण जिम्मेवारी सरकार स्वयंले लिनुपर्ने महासंघको चेतावनी छ।

शिक्षक महासंघको यो घोषणासँगै भदौ महिनादेखि शिक्षा क्षेत्रमा फेरि आन्दोलनको माहोल बन्ने संकेत देखिएको छ। अब सरकार वार्ताबाट समस्या समाधान गर्ने कि आन्दोलनको सामना गर्ने भन्ने विषयले शिक्षा क्षेत्रको आगामी दिशा तय गर्ने देखिन्छ।