Techie IT
  • बिहीबार, फागुन १०, २०८० / Friday, February 23, 2024
  • काठमाडौं
Education Samachar

Education Samachar

Nepal's No.1 Educational News Portal

गृहपृष्ठसमाचारत्रिविको उपकुलपतिमा भागबण्डा नगर्ने प्रधानमन्त्रीको संकेत

समाचार

त्रिविको उपकुलपतिमा भागबण्डा नगर्ने प्रधानमन्त्रीको संकेत

विज्ञहरुसँग भने, ‘विश्वविद्यालयलाई राजनीतिक भागबण्डा बनाउनु हुँदैन्’


काठमाडौं—प्रधानमन्त्री पुष्पकमल दाहालले विश्वविद्यालयलाई राजनीतिक भागबण्डा बनाउन नहुने बताएका छन् । बुधबार विहान प्रधानमन्त्री निवास बालुवाटारमा त्रिविका पूर्व उपकुलपति र लामो समय काम गरेका विज्ञहरुसँगको छलफलमा उनले विश्वविद्यालयमा आफू विगतको परम्परामा ब्रेक थ्रु गर्न लागेको बताए ।

डा. केदारभक्त माथेमा, डा. पिताम्बर शर्मा, डा. विद्यानाथ कोइराला, डा. चैतन्य मिश्र, प्रा. कृष्ण खनालसहितका प्रबुद्ध व्यक्तित्वसँगको छलफलमा प्रधानमन्त्रीले सो कुरा बताएका हुन् । यसबाट प्रधानमन्त्रीले विश्वविद्यालयमा भागबण्डा नगर्ने स्पष्ट संकेत दिएका छन् ।

प्रधानमन्त्रीले देश बनाउन सबभन्दा बेष्ट ब्रेनहरु केन्द्रित गर्नुपर्छ भन्ने आफ्नो विगतदेखि कै सोच रहँदै आएको उल्लेख गर्दै अहिले विश्वविद्यालयलाई राजनीतिक भागबण्डा बनाउनु हुँदैन भनेर लागिरहेको बताए । उनले विगतको परम्परामा ब्रेक थ्रु गर्न लागिएकाले यसमा बौद्धिक समुदायको साथ र सहयोगको अपेक्षा पनि व्यक्त गरेका थिए ।

दाहालले छलफलमा देश बनाउने जिम्मा सरकार, सबै राजनीतिक दलका साथै विभिन्न तह र तप्काका जनसमुदायको भएको धारणा समेत राखेका थिए। उनले अहिले देशको राजनीतिक, आर्थिक, सामाजिक, साँस्कृतिक र शैक्षिक क्षेत्रमा रुपान्तरणको खाँचो औल्याउँदै यसका लागि राज्यका साथै सबैले जिम्मेवारी लिनुपर्नेमा जोड दिएका थिए ।

प्रधानमन्त्रीले आफू प्रधानमन्त्री भएदेखि नै भोलिको उज्यालो र सम्मुन्नत नेपालका लागि सुशासन, सामाजिक न्याय र सम्वृद्धिका पक्षमा अनवरत काम गरिरहेको बताउँदै आम जनतालाई देशमै भविष्य छ भनेर भरोसा दिनुपर्ने दायित्व राज्यको भएकाले यसमा वौद्धिक समुदायको पनि महत्वपूर्ण भूमिका रहने औल्याए।

छलफलमा डा. केदारभक्त माथेमा, डा. पिताम्बर शर्मा, डा. विद्यानाथ कोइराला, डा. चैतन्य मिश्र, प्रा. कृष्ण खनालसहितका विज्ञहरुले प्रधानमन्त्रीले हालै विश्वविद्यालयमा भागवण्डा नगर्ने र मेरिटोक्रेसीबाट उपकूलपति छान्ने प्रक्रिया अघि बढाउनुले नयाँ आशा पलाएको भन्दै समग्र शिक्षा क्षेत्रसहित विश्व विद्यालयहरुको पुर्नसंरचना गर्नेगरी सुधार थाल्न आग्रह गरेका थिए । उनीहरुले प्रधानमन्त्री समक्ष विभिन्न विषयमा सुझाव प्रस्तुत गरेका थिए ।



तपाईको प्रतिक्रिया

ताजा अपडेट