छैटौं समूहको साथी शिक्षकका लागि आवेदन खुल्यो, मंसिर १५ सम्म आवेदन दिन सकिने

काठमाडौं– हेलम्बु एजुकेशन लाइभ्लीहुड पार्टनरसीप (हेल्प)ले साथी शिक्षक कार्यक्रमको छैटौँ कोहर्टका लागि आवेदन खुला गरेको छ । हेल्पले आगामी कात्तिक १ गते बिहिबारबाट छैटौं कोहर्ट साथी शिक्षकका लागि आवेदन खुला गरेको हो ।

ग्रामीण तहमा रहेका विद्यालयहरुमा प्राथमिक तहमा अंग्रेजी र गणित विषयको शिक्षण सिकाइ प्रभावकारी बनाउने उद्धेश्यले हेल्पले साथी शिक्षकका लागि आवेदन खुला गरेको हो । ग्रामीण क्षेत्रका विशेषगरी सामुदायिक विद्यालयको शिक्षण सिकाइ क्रियाकलापलाई प्रभावकारी बनाउन विभिन्न क्रियाकलाप गर्दै आएको हेल्पको साथी शिक्षक कार्यक्रम एक महत्वपूर्ण गतिविधि हो । त्यसैले साथी शिक्षकमा आवद्ध भई सेवा गर्न चाहनेले आगामी मंसिर १५ गतेभित्र आवेदन दिन सक्ने हेल्पले जनाएको छ ।

साथी शिक्षकमा छनोट भएकाहरुले निर्वाह भत्ता, तालिम र व्यक्तिगत क्षमता अभिवृद्धिको अवसर प्राप्त गर्ने हेल्पले जनाएको छ । ‘विद्यमान शैक्षिक अवस्थाको परिवर्तका लागि केही योगदान दिन इच्छुक हुनुुहुन्छ भने प्राथमिक तहमा दुई वर्षका लागि गणित र अंग्रेजी विषय पढाउन साथी शिक्षक यात्राको हिस्सा बन्न सक्नुहुनेछ,’ हेल्पले भनेको छ, ‘निर्वाह भत्तासहित गहन प्रशिक्षण र व्यक्तिगत क्षमता वृद्धिका लागि यो एक सुनौलो अवसर हुनसक्नेछ ।’

साथी शिक्षकका बारेमा विस्तृतमा बुझ्नका लागि https://saathiteachers.org/ र कार्यालयको फोन नम्बर ०१–४९१७२०९ मा सम्पर्क गर्न सकिने हेल्पले जनाएको छ ।