बोर्डका अध्यक्ष बालुवाटारमा, प्रधानमन्त्रीसँगको भेटपछि कक्षा १२ को परीक्षाबारे थप निर्णय हुने

काठमाडौं—राष्ट्रिय परीक्षा बोर्डका अध्यक्ष डा. महाश्रम शर्मा प्रधानमन्त्री केपी शर्मा ओलीलाई भेट्न बालुवाटार पुगेका छन् । बालुवाटार स्रोतकाअनुसार ११ बैशाखदेखि हुने कक्षा १२ को परीक्षा कसरी सञ्चालन गर्ने भन्ने विषयमा छलफल गर्न प्रधानमन्त्रीले बोलाएपछि बोर्ड अध्यक्ष शर्मा मंगलबार साँझ बालुवाटार पुगेका हुन् ।

‘उहाँ आइसक्नुभएको छ । प्रधानमन्त्रीज्यू अर्को बैठकमा हुनुहुन्छ,’ बालुवाटार स्रोतले भन्यो, ‘त्यो बैठक सकिएपछि उहाँहरुबीच छलफल होला ।’

२२ दिनदेखि शिक्षक महासंघको नेतृत्वमा शिक्षकहरु राजधानीमा हड्तालमा छन् । सरकारले आफ्ना मागहरु पूरा नगरेसम्म स्कुल नफर्किने अडान शिक्षकहरुको छ ।

शिक्षकहरुकै हड्तालकाबीच मंगलबार विहान बसेको बोर्डको बैठकले भने ११ बैशाखदेखि नै कक्षा १२ को परीक्षा गर्ने निर्णय गरेको थियो । बोर्डका पदाधिकारीहरुबीच शिक्षकहरु परीक्षाका लागि तयार नभएर कर्मचारीबाट परीक्षा गर्ने विकल्पमा यो निर्णय गरेको थियो ।

तर, यसमा पनि प्राविधिक जटिलता देखिने भएकाले परीक्षाबारे शिक्षा, विज्ञान तथा प्रविधी मन्त्रालयको जिम्मेवारी समेत सम्हालिरहेका प्रधानमन्त्री ओलीको निर्णय नै अन्तिम हुनेछ ।