जथाभावी विद्यार्थीको कपाल मुण्डन नगर्न विद्यालयहरुलाई महानगरको आग्रह

काठमाडौं । काठमाडौं महानगरपालिकाले विद्यार्थीहरुको मनोविज्ञानमा असर पर्ने गरी कपाल नकाटिदिन विद्यालयहरुलाई आग्रह गरेको छ । विद्यालयहरुले केटाहरुले लामो कपाल पालेको भन्दै कपाल मुण्डन पारेर काटिदिँदा विद्यार्थीहरुको मनोविज्ञानमा असर परेको भन्दै कपाल नकाटिदिन आग्रह गरेको हो ।

‘केही विद्यालयहरुले छात्रको कपाल लामो भएको भनि विद्यालयमा जथाभावी कपाल मुण्डन गरिदिने कार्यले मनोवैज्ञानिक असर परेको भनि गुनासो प्राप्त भएको छ,’ महानगरले जारी गरेको सुचनामा उल्लेख छ ।

महानगरले शिक्षा निमयावली, २०५९ को नियम २५ (ट) मा विद्यालय व्यवस्थापन समितिले विद्यार्थीले पालना गर्नुपर्ने आचारसंहिता बनाई लागू गर्ने र नियम १३३ (१) (ट) मा विद्यार्थीलाई शारीरिक वा मानसिक यातना दिन नहुने भन्ने व्यवस्था रहेको समेत उल्लेख गरेको छ ।