मनास्लु कलेजको अभिमुखीकरण कार्यक्रम सम्पन्न, ३.९६ जीपीए ल्याउने विद्यार्थीलाई २ लाख पुरस्कार घोषणा

एजुकेशन समाचार जेठ २७, २०८३ २०:४०

काठमाडौं । चाबहिलस्थित मनास्लु वर्ल्ड कलेजले कक्षा ११ मा भर्ना भएका नवआगन्तुक विद्यार्थीका लागि अभिमुखीकरण कार्यक्रम सम्पन्न गरेको छ । स्थापनाको छोटो अवधिमै देशभरकै १७औँ उत्कृष्ट कलेज बन्न सफल मनास्लु वर्ल्डले बुधबार भव्य समारोहबीच कार्यक्रम आयोजना गरेको हो ।

कार्यक्रमलाई सम्बोधन गर्दै कलेजका अध्यक्ष तथा कार्यक्रमका सभापति गेन्द्र लामाले कक्षा १२ को बोर्ड परीक्षामा ३.९६ जीपीए प्राप्त गर्ने विद्यार्थीलाई जनही दुई लाख रुपैयाँ पुरस्कार प्रदान गरिने घोषणा गरे । त्यस्तै, कक्षा ११ मा ४ जीपीए प्राप्त गर्ने विद्यार्थीलाई ५० हजार रुपैयाँसहित सम्मान गरिने जानकारी दिँदै उनले आफूहरूले गरेका प्रतिबद्धताबाट कहिल्यै पछि नहट्ने बताए ।

‘हामी प्रतिबद्धतामा कटिबद्ध भएर लागेकै कारण छोटो समयमै उत्कृष्ट शैक्षिक उपलब्धि हासिल गर्न सफल भएका हौँ,’ उनले भने, ‘हामी जे बोल्छौँ, त्यो गर्छौं । जे गर्न सक्दैनौँ, त्यो बोल्दैनौँ ।’

क्याम्पस प्रमुख राजन श्रेष्ठले कार्यक्रमको औचित्यमाथि प्रकाश पार्दै विद्यार्थीको सफलता केवल शैक्षिक प्रमाणपत्रमा सीमित नभई जीवनलाई सफल बनाउने मन्त्र प्राप्त गर्नु पनि रहेको बताए । उनले मनास्लुले विद्यार्थीलाई जीवन बदल्ने शिक्षा प्रदान गर्ने विश्वास व्यक्त दिलाए ।

कार्यक्रममा कक्षा १२ मा अध्ययनरत छात्रा अभियान घिमिरेले विद्यार्थी तथा अतिथिलाई स्वागत गर्दै मनास्लुमा अध्ययन गर्ने विद्यार्थीले किताबी ज्ञानसँगै आफ्नो अन्तरनिहित प्रतिभा उजागर गर्ने अवसर पनि प्राप्त गर्ने बताइन् ।

यस अवसरमा ‘मिस मनास्लु २०८१’ की विजेता तथा मनास्लुकी सद्भावना दूत रोशिन ढकाल र ‘मिस्टर मनास्लु २०८१’ का विजेता अस्बिन गुरुङलाई प्रशंसापत्रद्वारा सम्मान गरिएको थियो ।

सम्मानपछि बोल्दै ढकालले मनास्लुले चुनौतीसँग सामना गर्दै अगाडि बढ्न सिकाएको बताइन् । ‘समयले बहाना बनाउनेलाई होइन, चुनौती स्वीकारेर अघि बढ्नेलाई साथ दिने रहेछ,’ उनले भनिन्, ‘आज म जहाँ छु, मेरो जे परिचय बनेको छ, त्यो सबै मनास्लुकै कारण सम्भव भएको हो ।’ उनले मनास्लुलाई आफ्नो दोस्रो घरको संज्ञा दिइन् ।

कार्यक्रममा हालै सगरमाथाको सफल आरोहण गरेकी सरिता तामाङ लामालाई पनि सम्मान गरिएको थियो । कलेजका अनुसार उनको उपलब्धिले तामाङ समुदायका महिलामा आत्मविश्वास अभिवृद्धि गर्न योगदान पुर्‍याएको छ ।

सहायक प्रिन्सिपल गोपाल श्रेष्ठले विद्यार्थीलाई कलेजको आचारसंहिताबारे जानकारी गराएका थिए भने कक्षा १२ मा अध्ययनरत छात्रा रिया श्रेष्ठले मनास्लुमा अध्ययन गर्दाको अनुभव सुनाएकी थिइन् ।

उत्प्रेरक वक्ता तथा प्रशिक्षक सौरभ लोहोनीले विद्यार्थीमा सकारात्मक ऊर्जा भर्ने प्रेरणादायी प्रस्तुति दिएका थिए ।

यसैबीच, कक्षा ११ को बोर्ड परीक्षामा कलेज टप गर्ने देवेन्द्र दाहाललाई १० हजार रुपैयाँ नगदसहित सम्मान गरिएको थियो । साथै, विभिन्न अतिरिक्त क्रियाकलापमा उत्कृष्ट प्रदर्शन गर्ने विद्यार्थीलाई पनि पुरस्कृत गरिएको थियो ।

कार्यक्रममा गायक कर्णराज गिरी, मनास्लु ब्याण्ड र रकहेडले सांगीतिक प्रस्तुति दिएका थिए । साथै, कलेजका विद्यार्थीहरूले पनि विविध सांस्कृतिक तथा प्रतिभामूलक प्रस्तुति प्रस्तुत गरेका थिए ।