काठमाडौं विश्वविद्यालयको रिक्त उपकुलपति नियुक्तिका लागि आवेदन आह्वान

काठमाडौं । शिक्षा तथा खेलकुद मन्त्रालयले काठमाडौं विश्वविद्यालयको रिक्त उपकुलपति पदका लागि नाम सिफारिस गर्न गठित छनोट तथा सिफारिस समितिमार्फत आवेदन आह्वान गरेको छ ।

मन्त्रालयद्वारा प्रकाशित सूचनाअनुसार समितिले २०८३ असार ७ गते स्वीकृत गरेको काठमाडौं विश्वविद्यालयको उपकुलपति छनोट तथा सिफारिस सम्बन्धी कार्यविधि, २०८३ बमोजिम इच्छुक तथा योग्य व्यक्तिबाट दरखास्त माग गरिएको हो ।

सूचनामा उल्लेख भएअनुसार आवेदन दिन इच्छुक उम्मेदवारले सूचना पहिलो पटक प्रकाशित भएको मितिले १० दिनभित्र शिक्षा तथा खेलकुद मन्त्रालयको वेबसाइटमार्फत तोकिएको लिंकमा गई दरखास्त पेश गर्न सक्नेछन् ।

मन्त्रालयले उपकुलपति छनोट तथा सिफारिस सम्बन्धी कार्यविधि पनि आफ्नो वेबसाइटमा उपलब्ध गराएको जनाएको छ ।

काठमाडौं विश्वविद्यालयमा उपकुलपति पद रिक्त रहेकाले नयाँ नेतृत्व चयन प्रक्रियालाई अघि बढाउन मन्त्रालयले आवेदन आह्वान गरेको हो ।