गोसाइँकुण्ड गएका धादिङका ८ शिक्षक सम्पर्कविहीन

रसुवामा आएको बाढी तथा त्यसपछि उत्पन्न प्रतिकूल अवस्थाका कारण गोसाइँकुण्ड तीर्थयात्रामा गएका धादिङका आठ जना शिक्षक बुधबारदेखि सम्पर्कविहीन भएका छन्।

सम्पर्कविहीन हुनेमा धादिङका तीन जना कार्यरत शिक्षक र पाँच जना पूर्वशिक्षक रहेका छन्। धादिङको शिक्षा विकास तथा समन्वय एकाइका प्रमुख कृष्णकुमार श्रेष्ठका अनुसार उनीहरू गोसाइँकुण्ड यात्राका क्रममा रसुवा क्षेत्रमा पुगेपछि परिवार तथा सम्बन्धित व्यक्तिको सम्पर्कमा आउन सकेका छैनन्।

सम्पर्कविहीन हुने कार्यरत शिक्षकमा निलकण्ठ नगरपालिका–स्थित पशुपति माध्यमिक विद्यालयका ठाकुरप्रसाद लम्साल, देउराली माध्यमिक विद्यालयकी जानुका खनाल र पाल्पासामारी भञ्ज्याङ माध्यमिक विद्यालयका शिवहरी लम्साल रहेका छन्।

त्यस्तै, गोसाइँकुण्ड तीर्थयात्रामा गएका धादिङका पाँच जना पूर्वशिक्षकसमेत सम्पर्कविहीन भएका छन्। उनीहरूमा निलकण्ठ नगरपालिकाका तुलसी तिमिल्सेना र इश्वरी तिमिल्सेना, ज्वालामुखी गाउँपालिकाका नारायणप्रसाद लम्साल तथा सिद्धलेक गाउँपालिकाका हरिप्रसाद सिलवाल र घनश्याम भट्ट रहेका छन्।

बाढीका कारण रसुवाका विभिन्न क्षेत्रमा सडक तथा यातायात सम्पर्क प्रभावित हुनुका साथै सञ्चार सम्पर्कमा समेत समस्या देखिएको छ। यही कारण गोसाइँकुण्डतर्फ गएका यात्रुहरूसँग तत्काल सम्पर्क स्थापित गर्न कठिनाइ भएको जनाइएको छ।

यसैबीच, धादिङमा बाढी तथा प्राकृतिक विपद्बाट केही विद्यालयसमेत प्रभावित भएका छन्। शिक्षा विकास तथा समन्वय एकाइ धादिङका अनुसार बागेश्वरी माध्यमिक विद्यालय, अमलेश्वर गुरुकुल विद्यालय, सक्सेस एकेडेमी र जलेश्वरी माध्यमिक विद्यालय प्रभावित भएका छन्। ती विद्यालयमा भएको क्षतिको विस्तृत विवरण भने अझै यकिन हुन बाँकी रहेको एकाइले जनाएको छ।

सम्पर्कविहीन शिक्षकहरूको अवस्थाबारे परिवार तथा सम्बन्धित निकायले चासो व्यक्त गरेका छन्। उनीहरूको खोजी तथा अवस्थाबारे जानकारी लिन स्थानीय तह, विद्यालय र सम्बन्धित निकायबीच समन्वय भइरहेको जनाइएको छ।