पिसिएल नर्सिङ, एचए र डिप्लोमा इन फार्मेसीको शुल्क वृद्धि रद्ध

काठमाडौं—प्राविधिक शिक्षा तथा व्यवसायिक तालिम परिषद् (सिटीईभीटी) डिप्लोमा तहका स्वास्थ्य शिक्षाका कार्यक्रममा गरेको शुल्क वृद्धि रद्ध गरेको छ । बिहीबारको परिषद् कार्यलयको बैठकले १ असारमा डिप्लोमा तहका पिसिएल नर्सिङ, सामान्य चिकित्सा (एचए) र डिप्लोमा इन फार्मेसीमा गरेको शुल्क वृद्धिको निर्णय रद्ध गरेको हो ।

गत १ असारमा परिषद् कार्यलयले पिसिएल नर्सिङ, एचएच र डिप्लोमा इन फार्मेसीमा शैक्षिक सत्र २०८०/०८१ बाट लागु हुने गरी शुल्क वृद्धि गर्ने निर्णय गरेको थियो । परिषद्ले शुल्क वृद्धि गरेर पिसिएल नर्सिङमा ६ लाख २४ हजार २३० रुपैयाँ, एचएमा ५ लाख २३ हजार ८२० रुपैयाँ र डिप्लोमा फार्मेसीमा ४ लाख २३ हजार ६६० रुपैयाँ शुल्क तोकेको थियो ।

उक्त शुल्क वृद्धिको चौतर्फी विरोध भएपछि ४ साउनमा परिषद्ले उक्त शुल्क वृद्धिको निर्णयलाई स्थगन गरेको थियो । त्यतिबेला उसले सरोकारवालाहरुसँग छलफलपछि मात्रै शुल्क वृद्धि गर्ने भन्दैं निर्णय स्थगत गरेको थियो ।

तर, दबाब बढ्दैं गएपछि ३२ साउनमा उसले शुल्क वृद्धि गर्ने निर्णय रद्ध गरेको हो ।