भारतीय सुटर प्रयोग गरेर एकता बोर्डिङ स्कुलका प्रिन्सिपलको हत्या

वीरगन्ज—गोली लागेर मृत्यु भएका बाल एकता बोर्डिङ स्कुलका प्रधानाध्यापक रुपेश स्वर्णकारको हत्यामा भारतीय भाडाका सुटर प्रयोग भएको खुलेको छ । सोमबार दिउँसो बारा कलैया—६ मा मोटरसाइकलमा आएका अज्ञात व्यक्तिले उनलाई गोली हानेर फरार भएका थिए ।

घाँटी र छातीमा चार राउण्ड गोली लागेका उनलाई उनलाई लगतै कलैया अस्पताल लगिएको थियो । त्यहाँ उपचार सम्भव नभएपछि वीरगन्जस्थित मेडिसिटी बयोधा अस्पताल लगिएको थियो । उनको काठमाडौं ल्याउने तयारी गर्दागर्दै उपचारका क्रममा मृत्यु भएको थियो ।

प्रहरी स्वर्णकारमाथि गोली चलाउने योजनामा संलग्न रहेको आरोपमा कलैयाकै एक महिलासहित ६ जनालाई प्रहरीले पक्राउ गरेर अनुसन्धान अगाडि बढाएको बाराका प्रहरी प्रवक्ता एवं डिएसपी दधिराम न्यौपानेले जानकारी दिए।

पक्राउ पर्नेमा तीन जना भारतीय छन्। हत्यामा भारतीय सुटरको प्रयोग गरिएको देखिएको छ।

पक्राउ परेकी महिलाकै योजनामा भारतबाट सुटर मगाएर गोली हानी हत्या भएको प्रारम्भिक अनुसन्धानमा देखिएको छ । एकजना महिलासँग उनको प्रेम सम्बन्ध रहेको थियो । ती महिलाको अर्कै पुरुषसँग पनि प्रेम सम्बन्ध रहेको र त्यही कारण उनको सुटर प्रयोग गरेर हत्या गरिएको प्रहरी अनुमान छ ।