त्रिविको निमित्त उपकुलपतिमा प्रा.डा. भुसाल

काठमाडौं—मुलुककै सबैभन्दा जेठो र ठूलो त्रिभुवन विश्वविद्यालयको निमित्त उपकुलपतिमा प्रा.डा. शिवलाल भुसाल नियुक्त भएका छन् । १६ कात्तिकबाट उपकुलपति प्रा.डा. धर्मकान्त बाँस्कोटाको कार्यकाल सकिएपछि निमित्तको जिम्मेवारी प्रा.डा. भुसालले पाएका हुन् ।

विश्वविद्यालयका कुलपतिसमेत रहेका प्रधानमन्त्री पुष्पकमल दाहालले १७ कात्तिकमा प्रा.डा. भुसाललाई निमित्त उपकुलपतिको जिम्मेवारी दिने निर्णय गरेका हुन् ।

त्रिभुवन विश्वविद्यालय ऐन, २०४९ को दफा २१ (ख) बमोजिम दैनिक कार्यसंचालनका लागि भुसाललाई निमित्तको जिम्मेवारी दिइएको हो । विश्वविद्यालय ऐनअनुसार तीन महिनाभित्र उपकुलपति नियुक्ति गर्नुपर्नेछ ।