एकआपसमा मर्ज हुन चाहने क्याम्पसलाई असार मसान्तभित्र निवेदन दिन त्रिविको आह्वान

काठमाडाैं । त्रिभुवन विश्वविद्यालयले मर्ज हुन चाहने क्याम्पसहरुलाई असार मसान्त भित्र निवेदन दिन आह्वान गरेको छ । त्रिविले सूचना जारी गर्दै एकआपसमा गाभिन चाहने सम्बन्धन प्राप्त क्याम्पसहरुलाई निवेदन दिन आह्वान गरेको हो ।

मर्ज हुन चाहने क्याम्पसहरुले आफ्नो क्याम्पस सभा वा सञ्चालक समितिबाट समायोजन हुने निर्णय गराएर निर्देशनालयमा निवेदन दिन सक्नेछन् ।

निवेदनको साथमा मर्ज हुन इच्छुक क्याम्पसको बेग्लाबेग्लै निवेदन, मर्ज गर्नुपर्ने औचित्य खुलेको र समाहित हुने क्याम्पस खारेज गर्ने समितिको निर्णय, सम्बन्धन पत्रहरु, नवीकरण पत्रहरु र अक्षयकोषको रसिदसमेत पेस गर्न त्रिविको सूचनामा उल्लेख छ ।

विश्वविद्यालय अनुदान आयोगका अनुसार देशभर १ हजार ४४० आंगिक, सामुदायिक र निजी क्याम्पसहरुमध्ये ३ सय निजी, २१८ सामुदायिक र २१ क्याम्पसमा १०० भन्दा कम विद्यार्थीहरु छन् । कतिपयले अध्यापक र कर्मचारीहरुलाई तलबसमेत खुवाउन नसकेका समाचार सार्वजनिक हुने गरेका छन् ।

त्रिविका कतिपय सम्बन्धन प्राप्त र आंगिक क्याम्पसहरु न्युन विद्यार्थी र सन्चालन खर्चको अभावमा संकटमा छन् । तिनैलाई लक्षित गर्दै त्रिविले उक्त सूचना जारी गरेको हो ।