एसइइमा ४ जीपीए ल्याउने ७५ जनालाई गोकर्णेश्वर नगरपालिकाले कक्षा ११ र १२ नि:शुल्क पढाउने

काठमाडौं । गोकर्णेश्वर नगरपालिकाले एसइइ परीक्षामा उत्कृष्ट नतिजा हासिल गर्ने विद्यार्थीलाई लक्षित गर्दै विशेष शैक्षिक कार्यक्रम घोषणा गरेको छ ।

नगरपालिकाले शैक्षिक सत्र २०८२ को एसइइ परीक्षामा ४.० GPA प्राप्त गरेका ७५ जना विद्यार्थीलाई कक्षा ११ र १२ सम्म नि:शुल्क अध्ययनको व्यवस्था गर्ने भएको हो । नगर प्रमुख दिपक कुमार रिसालका अनुसार नगरपालिकाभित्र सञ्चालित ५८ वटा सामुदायिक तथा संस्थागत विद्यालयमा उक्त सुविधा उपलब्ध गराइनेछ ।

नगरपालिकाद्वारा जारी सूचनाअनुसार योग्य विद्यार्थीहरूले आफूले इच्छाएको विद्यालय छनोट गरी भर्ना लिन सक्नेछन् । उत्कृष्ट नतिजा ल्याउने विद्यार्थीलाई थप प्रोत्साहन गर्नुका साथै गुणस्तरीय शिक्षामा पहुँच विस्तार गर्ने उद्देश्यले कार्यक्रम ल्याइएको नगरपालिकाले जनाएको छ ।

नगर प्रमुख रिसालले शिक्षा क्षेत्रमा प्रतिस्पर्धात्मक वातावरण सिर्जना गर्दै मेहनती विद्यार्थीलाई थप हौसला प्रदान गर्न यस्तो निर्णय गरिएको बताए । आर्थिक अवस्था कमजोर भएका तर अध्ययनमा उत्कृष्ट विद्यार्थीलाई समेत यस योजनाले राहत पुग्ने अपेक्षा गरिएको छ ।

नगरपालिकाले सम्बन्धित विद्यार्थीलाई यथाशीघ्र आफूले छनोट गरेको विद्यालयमा सम्पर्क गरी भर्ना प्रक्रिया पूरा गर्न आग्रह गरेको छ ।

स्थानीय तहबाट शिक्षा क्षेत्रमा गरिएको यो निर्णयलाई विद्यार्थी, अभिभावक तथा शिक्षा क्षेत्रले सकारात्मक कदमका रूपमा लिएका छन् । शिक्षा क्षेत्रमा स्थानीय सरकारको सक्रियता बढ्दै गएको उदाहरणका रूपमा पनि यसलाई हेरिएको छ ।