साइपाल एकेडेमीका केन्द्राध्यक्ष र सहायक केन्द्राध्यक्ष प्रहरी नियन्त्रणमा

काठमाडौं– सुकेधारास्थित साइपाल एकेडेमीका केन्द्राध्यक्ष गणेश जोशी र सहायक केन्द्राध्यक्ष संज्ञा खतिवडालाई प्रहरीले नियन्त्रणमा लिएको छ । कक्षा १२ को परीक्षामा मर्यादा विपरित कार्य गरेको भन्दै महानगरीय प्रहरी वृत्त महाराजगञ्जबाट खटिएको टोलीले उनीहरुलाई नियन्त्रणमा लिएको हो ।

जोशी साइपलका प्रिन्सिपल हुन् । भने, उनीसँगै प्रहरी नियन्त्रणमा रहेका खतिवडा सहायक प्रिन्सिपल हुन् ।

बिहिबार भएको कक्षा १२ ‘होटल म्यानेजमेन्ट’ विषयको परीक्षामा प्रश्नपत्र समय अगावै बाहिरिएको भन्दै महाराजगञ्ज वृत्तमा उजुरी परेपछि उनीहरुलाई सोधपुछका लागि नियन्त्रणमा लिइएको महानगरीय प्रहरी वृत्त महाराजगञ्जका प्रहरी नायब उपरीक्षक निरञ्जन थापाले जानकारी दिए । ‘परीक्षाको मर्यादा विपरीत कार्य भयो भन्दै हाम्रोमा उजुरी पर्यो,’ उनले भने, ‘अनुसन्धान गरिरहेका छौँ ।’