ट्रम्प प्रशासनद्वारा हावार्डमा अन्तर्राष्ट्रिय विद्यार्थी भर्नामा रोक, भर्ना भएका विदेशी विद्यार्थीले अन्यत्र ट्रान्सफर लिनुपर्ने

वासिङ्गटन—ट्रम्प प्रशासनले प्रतिष्ठित हावार्ड विश्वविद्यालयको अन्तर्राष्ट्रिय विद्यार्थी भर्ना गर्ने अनुमतिलाई रोक लगाइदिएको छ । ट्रम्प प्रशासनको अमेरिकाको पूरानो विश्वविद्यालयसँग चर्किएको असमझदारीकाबीच यो निर्णय आएको हो ।

अमेरिकाको डिपार्टमेन्ट अफ होमल्याण्ड सेक्युरिटीकी प्रमुख क्रिस्टी नोमले सामाजिक सञ्जाल एक्समा कानुनसम्मत काम गर्न असफल भएकाले यो निर्णय लिइएको बताएकी छन् । ‘कानुनसम्मत काम गर्न विफल भएकाले हावार्डको स्टुडेन्ट एन्ड एक्सचेन्ज भिजिटर प्रोग्राम सर्टिफिकेशन खारेज गरिएको हो,’ उनले एक्समा उल्लेख गरेकी छन् ।

उनले यो निर्णय अन्य विश्वविद्यालयहरुका लागि चेतावनी भएको पनि उल्लेख गरेकी छन् ।

यस्तै, अब हावार्डमा भर्ना भइसकेका विदेशी विद्यार्थीहरुले अन्य विश्वविद्यालयमा ‘ट्रान्सफर’ लिनुपर्नेछ । यसले हावार्डमा अध्ययनरत हजारौं अन्तर्राष्ट्रिय विद्यार्थी प्रभावित हुनेछन् । हावार्डले सरकारको यो कदमलाई गैरकानुनी भनेको छ ।